Cumò al va un pôc miôr, ma al reste un probleme
Prin di passâ a argoments un tic mancul tribulâts, lassait che o finissi cui gjornâi di chenti e cu la part che a àn a soreli a mont su lis cuistions furlanis. O ai scrit, la volte passade, dal gjornalist che al à vude la cariere çoncjade. Pôc timp dopo, il stes al veve metût adun une serade di poesie furlane e le veve inmaneade benon, come che a àn podût viodi un trop di nô lâts di pueste a scoltâ par capî la contradizion a pet di cemût che il so gjornâl al tratave il Friûl. Dome plui tart si rivà a capî che lui al jere debil e che di fat la redazion le tignive pe brene un personaç ben cognossût a Pordenon che le veve a muart cui furlans. O, almancul, cussì al someave. Ma ancje chest personaç nus risiervà une sorprese. Al vignì a mancjâ, nancje tant vecjo purtrop, e cun dut ce che al veve fat cuintri de Furlanie tal santin di muart si fasè meti “Stelutis alpinis”. Va tu a capîlis ciertis robis.
◆ O ai dit, ancje, che cuant che il gjornâl di… Vignesie si discjadenà cuintri dal Friûl, nô furlans o speravin che a difindinus al saltàs sù chel… venit. Un troput di nô i faserin une propueste clare: cjalait, se cjapais la part dai furlans, o pierdarês cualchi copie inte citât di Pordenon, ma indi cuistarès tantis di plui sul teritori. Nuie ce fâ! In chê volte il gjornâl nus fasè capî parcè che, ancje se lu stampavin a Udin, si clame “venit”.
◆ Oltri ai doi cuotidians, o vin il setemanâl de Diocesi di Concuardie “Il Popul”. Ancje chel, in chê volte, nus tirave patafs une setemane sì e chê altre ancje. Si incagnive plui di ducj cuintri dai furlans un predi che al tignive une rubriche, par altri vivarose e gjoldibile. Le veve su cun nô e, un tic par volte, si veve capît che i vignive dal jessi stât plevan a Navarons di Midun, paîs di garibaldins, là che a messe a levin dome dôs vecjutis. Ma nol scherçave nancje il diretôr che, une volte, al veve licuidât la cuistion cun chestis peraulis: “A son muartis tantis lenghis, al pues murî ancje il furlan”. E, invezit, o sin ancjemò chi, siôr plevan!
◆ Però si à di dî che di cualchi an incà o stin lant in miôr. Ancje cheste volte al a scomençât il gjornâl di Vignesie. Cul cambi di proprietât, dai venits ai romans, la presse di meti lis mans sul Friûl, e par chel dividilu e dineâlu, e je vignude mancul. Chel altri cuotidian, par fortune, al è lât daûr e, cun fadie, si è rivâts ancje a limitâ lis denominazions “Diestre Tiliment” e “Pordenonês” e doprà plui spes lis denominazions coretis furlanis.
◆ Al reste su ducj doi i cuotidians la cuistion dai sottitui des dôs edizions. Al è un fal grues, alc di lapis ros, no cate che lis nestris mestris a racomandassin di no messedâ narançs cun pomodoros. O scrîf dal fat che, inmò in dì di vuê, o vin il “Gjornâl dal Friûl” e il “Gjornâl di Pordenon”. Robe cetant sbaliade e grivie che, messedant une regjon cuntune citât, e fâs crodi che il Friûl al sedi dome la ex provincie di Udin e che a soreli a mont nol sedi plui Friûl. E achì e vûl fate un altre bataie! ❚
