Sfuei Mensîl Furlan Indipendent
Archivi de Patrie

(L)INT FURLANE. Un popul dome par sintût a dî

............

✽✽ Il president de Republiche, Sergio Mattarella, in ocasion de sô visite pes celebrazions dal 150° aniversari de anession di part dal Friûl al Ream di Italie intal 1866, al è intervignût su lis pagjinis dal Messaggero Veneto cuntun scrit a sô firme. No sai cui che al vedi consultât prime di scrivilu o cuâl segretari particolâr lu vedi proponût, ma in dut câs al è indicatîf par capî cuale cognossince di nô furlans, a àn chei che a comandin da lis spuindis dal Tevere.
✽✽ Dome retoriche e aprossimazion, cuasi un “sintût a dî” e nancje il plui piçul tentatîf di cjapâ dentri la nestre storie, di interpretâ lis vicendis in mût obietîf. O vin cjatât fûr in chel articul la conferme che, di là des peraulis di circostance, simpri compagnis e stereotipadis in bocje a ogni visitadôr rivât chi par cualchi manifestazion o in cercje di vôts, al esist e al resist, fin de colade dal Patriarcjât aquileiês, la convinzion che nô o sin “i ultins”.
✽✽ No dome chei, plens di miserie dignitose, descrits di pre Turoldo, ma une sorte di raze in estinzion: chei che, par lôr ignorance e cjaviestriarie, a refudin, un secul daûr chel altri, di inneâ intal mâr grant, di jessi fats anonims di ce che îr lu clamavin progrès, vuê globalizazion. Doman al è forsit miôr no savêlu.
✽✽ E al è un fîl ros che al unìs il pinsîr di Mattarella a chel che al imbombe i partîts talians, favorevui ducj a dismenteâ la storie vere par rivâ a agregazions istituzionâls che no tegnin cont de specificitât, des minorancis.
✽✽ Nissun nol varà mai il cûr di declarâlu in maniere publiche in Friûl, anzit si scanisi a prometi che la specialitât no si tocje,  che la autonomie e risultarès “blindade” se al vincès il “SI” al referendum di Dicembar. Se al prevalès invezit il “NO”, dut al restarès compagn: autonomis su la cjarte, esponûts al aiar centralist tant che prime, ma almancul bogns di contrastâlu.
✽✽ La nestre rispueste duncje e varès di lâ di là dal risultât referendari, ribatint biel scrivint il gnûf statût regjonâl lis resons  de nestre autonomie.
Che si base, visinlu simpri e a ducj, sul principi de difese des minorancis linguistichis de regjon: furlans, slovens e todescs.
✽✽ “Sul dirit al autoguvier dai popui”,  o zontarès jo. ❚
✒ Dree Valcic

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +