Lis soferencis de Presidente lant viers dal referendum

Lu vevin dit sotvos, tal numar passât, ma cumò ancje l’Autoritât Gjenerâl pes Comunicazions nus à dat reson: la cunvigne dai 7 di Otubar in Regjon a Udin e jere une violazion de par condicio, paiade cun beçs publics par fâi propagande al SI pal referendum costituzionâl. La presidente Serracchiani e podeve organizâ une manifestazion di partît par firmâ la Cjarte di Udin cui siei coleghis des Provincis di Trent e Bolzan: e invezit e à sielzût di doprâ la sô autoritât istituzionâl, lant oltri dai spazis di cui al gjolt cui che al à di une cjame di guvier, ven a stai une posizion privilegjade rispiet ai mieçs di comunicazion. Clâr che ce che e à fat la Serracchiani al è il spieli in piçul di ce che al sta fasint Matteo Renzi a nivel talian, cuntune presince mediatiche pardabon ossessive a spiegâ a ducj che il NO al vûl di restâ fers, invezit di cambiâ.
Magari cussì no, dut câs, il front di chei che NO vuelin la riforme al va indevant a marcâ che la riforme e cope lis Regjons a Statût ordinari gjavantjur ogni competence. E il maçalizi di chês Speciâls al è dome rimandât ae revision dai Statûts, che no podarà jessi rimandade al infinît. Par biei e bogns che a sedin i components dal Guvier, la intese jenfri Stât e Regjon e varà di jessi po aprovade dal Parlament. E al è lì che no si podarà sperâ di vê nuie di bon: par chest, int come Sergio Cecotti e cor ator pal Friûl de mont al mâr par visâ i furlans che, se a tegnin ae Autonomie, a àn di votâ NO. Daûr di cheste posizion, ma plui par motivazions leadis aes dinamichis dal Parlament talian, a son ancje Leghe, Fradis di Italie e Moviment 5 Stelis. La presidente Serracchiani invezit e sburte par fâ votâ SI inte profonde convinzion che la nestre Specialitât e larà a cressi e no a crevâsi. Par cumò, dut câs, no à vût buinis gnovis des elezions comunâls che ator pal Friul a àn viodût il Pd in fuart ridimensionament. O savarìn dome ai 4 di Dicembar se chest al varà riflès ancje sul referendum. ❚
✒ Walter Tomada