Sfuei Mensîl Furlan Indipendent
Archivi de Patrie

Pre Checo, il gjenuin. La sô vite, un esempli di furlanetât

............

pre Checo Placerean
pre Checo Placerean

«O starès par dî che la crisi e je plui dai predis che de int». «Jo o crôt che ur mancj gjenuinitât.» «A un ciert pont, taie di ca, fruce di là, si sin dismenteâts de gjenuinitât de nestre int e de gjenuinitât de religjon de nestre int.» «Como che viodês, al jere tant naturâl che o disessin usgnot la messe in furlan.» A son frasis cjapadis de predicje di Pre Checo Placerean, durant la messe ae Madone di Gracie a Udin, ai 22 di Zenâr dal 1972. Cheste e altris sôs peraulis, lis podês lei e sintî par intîr, de so vive vôs, cirint intal sît istitutladinfurlan.it. E o cjatarês tantis altris notiziis, une vore interessantis, sul so cont.
In chest discors, in particolâr, Pre Checo al ricuardave l’unitât de Glesie furlane, gjenuine tai timps dal Patriarcjât: «Parcè che i furlans a son furlans par vie de diocesi patriarcjâl», domandantsi daspò il sens dal titul e dai obietîfs di un Congrès Eucaristic des comunitâts locâls, li par jessi inmaneât. A son passâts cuasi 45 agns di chê volte.
Atent, savi, erudît e sclet, Pre Checo Placerean, nassût ai 30 di Novembar dal 1920 a Sant Andree, in borc bulons a Montenârs, tierç di cinc fradis. Consacrât predi di Bons. Nogara, Vescul di Udin, tal 1944 al si indotore a Rome inte Universitât Gregoriane. Tal ‘48 al partìs pe Argjentine, indulà che al insegne morâl tal seminari di Rosari, e al torne in Friûl tal 1952. Professôr di religjon al Liceu classic Stellini di Udin e al Convit Paolo Diacono di Cividât, in te sô tiere si fâs ce tant atîf par tornâ a dâi cussience ai furlans, de lôr identitât, spironant a combati ogni sorte di sotanisim.
Tra i fondadôrs tal 1966 dal Moviment Friûl, al è assistent diocesan des associazions cristianis dai lavoradôrs e dai artesans talians (ACLI e ACAI) e il so impegn lu dimostre no dome in tancj scrits, discors e dibatits che e animavin, in gracie ae sô frescjece inteletuâl e ae sô anime gjenuine, largje part de opinion publiche furlane. La sô vôs la jevave disturbant fintremai la politiche, rivant ancje tal forest. Di fat, a son tantis lis sôs intervistis in lenghe todescje. Tant al à fat, che al si è impegnât ancje pe fondazion de Universitât Furlane.
Fin tradutôr des Sacris Scrituris, Pre Checo Placerean al à voltât, dal 1971 ae muart – rivade tal ospedâl di Udin ai 18 di Novembar dal 1986 -, il Messâl Furlan par l’an A, B e C e i vot volums de Bibie, cheste ultime insiemi a Pre Toni Beline. Al è autôr di diviersis altris oparis, leadis ae Glesie Furlane e plui in larc ae storie, passade e presinte, dai furlans, pe riscuvierte de lôr identitât. Famose e je la so frase: «Se pes orelis di cualchidun la peraule autonomie e je masse fuarte, si contentìn ancje de indipendence». Une espression che e je ancje la cifre dal so caratar di om, prime che predi, convint di ce che al dîs, cence pei su pe lenghe. Un furlan di chei vêrs.
L’Orcolat, tal 1976, al disfe ancje la cjase di Pre Checo, come dute Montenârs e un biel toc di Friûl. Ma lui no si dispere e la sô dedizion no mole, anzit e cres. Dongje la int come simpri, impegnât in dut e dapardut, al devente inmò plui un pont di riferiment pai furlans, pal popul furlan. Al di là des amarecis cul vescovât e diviersis incomprensions cui oms di podê dal timp, la gjenuinitât di Pre Checo Placerean, e il so voli atent ai cambiaments, a restin dai clârs esemplis di une rare ereditât furlane di tignî cont. Pre Checo Placerean, che nus à lassâts trente agns fa, al reste e al à di restâ un toc impuartant, fondamentâl, de storie dal nestri Friûl. ❚
✒ Alessio Screm
__________________________________
Par savênt di plui: “Notis par une biografie»
Pre Checo Placerean al à lassât scrit pôc e nuie, al jere un om di grande comunicative cu la peraule, ma nol jere intes sôs cuardis chê di puartâle in scrit. Cun dut a chel, al è rivât a lassâ il segn inte storie dal Friûl, un segn di chei che a restin plantâts in dentri. Par savê di plui su la sô figure si pues lei il libri scrit di un altri grant de culture furlane: Pre Checo Placerean, Notis par une biografie di pre Toni Beline.
No une biografie, duncje, ma notis, ricuarts di pre Toni su pre Checo. Notis che a piturin un om in dute la sô complessitât. Il libri al è struturât su lis oris dal breviari, Madins (la nassite, la infanzie), tierce (la formazion), seste (il misdì de vite, cu la plene des fuarcis e de ativitât), none (il moment dal dolôr, des polemichis e de malatie) complete (la muart e ce che al reste di lui tant che testemonenance). Un libri scrit cul furlan sflandorôs di pre Toni su une figure straordenarie. Di no pierdi: storie e lenghe dal Friûl intune. ❚ (A.S.) Screm

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +