Sfuei Mensîl Furlan Indipendent
Archivi de Patrie

(L)INT FURLANE. E cumò, anìn di gnûf a vinci

............


**O sierìn l’an cuntune vitorie: Sapade e torne in Friûl. Si sin batûts dispès bessôi fra ducj in chescj agns, par che chest al sucedès, tal mieç di “lenghis doplis” che a peraulis a sostignivin chest dirit, intant che intai fats a ritardavin il risultât finâl.
**O celebrìn in maniere juste, e nol sucêt dispès, cemût ancje che o celebrìn cu la publicazion dal nestri libri Cuntristorie de Prime Vuere mondiâl 1914-1918 une altre medaiute. Graciis al grant Agnul Floramo par vê zontât un tassel impuartant a dutis lis iniziativis che o vin afrontadis par contrastâ la retoriche talianiste.
**Tant che par Sapade, no vin mai molât.
**Alc al è daûr a cambiâ e il merit al va ancje al cûr dal popul catalan che al à metût in lûs lis contradizions dai stâts centraliscj, de Europe dai banchîrs e dai resonîrs, fasint risaltâ e tornâ a emerzi la nature autoritarie dal regjim spagnûl. Il franchisim nol è muart, cemût che dal rest i rivocs fassiscj e naziscj a dimostrin  un pôc dapardut: lis minorancis, tant che la storie e à dimostrât, a saressin lis primis vitimis sieltis.
**Vigjilâ su lis vielis e gnovis formis che il totalitarisim al podarà assumi al vûl dî pai furlans cjapâsi sù in plen e in prime persone ognidun la responsabilitât di gjestî in propri il futûr: chest al significhe autonomie.
**Cheste duncje la gnove sfide, includude chê eletorâl dal an prossim pe Regjon e par comuns impuartants tant che Udin. Il senari si mostre simpri plui clâr tra chei che a sielzaran di inschiriâsi di flanc e di cirî aleancis cui partîts talians, e cui che al sielzarà invezit la strade opueste.
**Chest al è l’element vêr e unic che al discrimine. A ognidun il cjapâsi la responsabilitât che di chê al varà di rindi cont no al nomenât o al elet di turni, ma al popul furlan.
**Il timp des indecisions, dai distinguo leâts dispès a vecjos personalisims al è finît, tant che al è finît ancje chel dal disimpegn, de passivitât.
I sapadins nus àn dimostrât che al è pussibil vinci se si reste unîts in non dal Friûl, pal Friûl. Il rest e je miserie, umane e politiche.
✒ Dree Valcic

Event / Stin dongje ae Patrie – fotos de serade

Redazion
Joibe ai 30 di Novembar al Teatro San Giorgio – Udin (Borc di Graçan) si è tignude la seconde edizion de manifestazion “Stin dongje ae Patrie” che e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte […] lei di plui +