La Catalogne in spiete

Par catalan “esperar” al vûl dî tant “spietâ” che “sperâ”, ma in chestis ultimis setemanis al somee che la date dai 21 di Dicembar, cu lis elezions regjonâls, si le spieti a fuart, come se prime di chel moment nol podès sucedi nuie, ma cence masse sperancis.
Lis grandis mobilitazions catalanis a àn fat vignî fûr trop che a son antidemocratics il guvier e il stât spagnûl, trop che e je politicizade la justizie, ma no son rivadis a butâ jù chel sisteme.
In Catalogne e je cumò une polarizazion, cun indipendentiscj simpri plui convinçûts che un futûr te Spagne al è impussibil, ma ancje cun unioniscj convinçûts che cualsisei sisteme, ancje ilegâl e violent, si pues justificâ, cun dutis lis bausiis e ipocrisiis che a coventin, pûr di mantignî la Spagne “une e grande”.
Rivâ a une soluzion al reste ancjemò une vore lontan: dai scandais al somee che cui che al vinçarà, al vinçarà di masse pôc. Se a varan la maiorance i partîts catalaniscj, a Madrid a cjataran simpri un mûr di gome, no si podarà mai otignî un referendum concuardât, cemût che al è sucedût in Scozie; se a saran di plui i vôts dai unioniscj, vâl a dî PP (popolârs, di diestre), PSC (socialiscj), C’S (populiscj oportuniscj), a varan acusis di iregolaritâts e imbrois e in ogni câs no podaran proponi un guvier salt e implantât su la condivision di un program.
Al somee che la politiche e sedi dispossente, come une moscje che e bat simpri su chel veri. Ce che al romparà il veri, se no sarà la politiche, e podarà jessi la economie: la Spagne e je un stât debil in ducj i sens, indebitât, destinât, ancje pe crisi cu la Catalogne che e je la sô regjon plui produtive, a indebilîsi e indebitâsi ancjemò di plui.
Il debit de Spagne cu la Europe al è dal sigûr tra i motîfs che a àn puartât lis plui altis istituzions de Union a pandi, almancul a nivel uficiâl, une poie ferme al guvier di Rajoy: ce sucedaraial cuant che la incapacitât e coruzion spagnole a daran di risultât une crisi inmò plui grivie?
di Sandri Carrozzo