Lenghe furlane protagoniste in Frisie

La esperience di Dj Tubet,
a Leeuwarden a rap-presentâ il Friûl
Leeuwarden, la capitâl de Frisie, in Olande, e je la Capitâl europeane de Culture pal 2018 e, inte suaze des manifestazions, tantis a son ancje lis ativitâts dedicadis aes lenghis e in particolâr a chês piçulis di dute Europe.
Afûk (la organizazion pe promozion de lenghe e de culture frisone) e à ideât il MeM – Livingroom of Languages, un paveon speciâl dulà che ogni setemane e je dedicade a une lenghe. Dai 12 ai 19 di Avost, e je stade presentade la lenghe furlane. Par cheste ocasion, intal paveon si à podût visitâ la mostre “Furlan, Lenghe de Europe”, curade dal diretôr de Agjenzie Regjonâl pe Lenghe Furlane William Cisilino, ma ancje la musiche e je stade protagoniste, in gracie de presince dal rapper furlan Dj Tubet, che ogni dì si è esibît cun concierts e performances cun altris grups e artiscj, e che al conte la sô esperience a La Patrie dal Friûl.
Il sens di ospitalitât frison
«O soi stât une vore braurôs di jessi stât invidât de Afûk, e o ringracii la Arlef par vêmi sostignût in cheste imprese. Dilunc de setemane o ai vût mut di sunâ insiemi cu la formazion asturiane Xera-Raíz, cu la band jazz frisone Jolly F e cul rapper Roc-E de minorance papiamento. La setemane e jere organizade in mût che la lenghe che e rivave ospite tal imprin si cjatàs cu la lenghe de setemane prime; intal mieç al jere previodût un incuintri cu la musiche frisone, e ae fin de setemane si incuintravisi cu la prossime lenghe. Tant che turist/ospit o ai vût mut di durmî intun barcjon a vele che al faseve di bed & breakfast. Biel chest sens di ospitalitât frison parcè che ti fâs un pôc vivi ae lôr maniere… Al sarès biel se ancje in Friûl, cuant che o organizìn events, si cirìs di meti la int in alc di tipic par fâju vivi te nestre maniere culturâl».
Frison ben presint te capitâl
«La lenghe e la culture frisonis a son ben presintis te citadine cun tantis scritis sui marcjepîts des placis e sui marmui des viis dulà che al è sucedût alc di impuartant pe lôr int. Il fat curiôs al è che chestis scritis spes no àn traduzion in altris lenghis: si capìs cussì che si è intun altri mont. La sede de Afûk e je logade tal centri de citât e e je ancje une vetrine espositive e comerciâl di prodots, libris e gadgets in lenghe e culture frisone. Chest mi à fat pensâ che i furlans no àn une sede uniche in centri a Udin dulà podê viodi o comprâ ducj i libris fin cumò jessûts in furlan o in merit ae culture furlane».
Omrop Fryslân, il canâl televisîf dut par frison
«Come media, a àn un canâl televisîf unic in lenghe frisone  – Omrop Fryslân – che al fâs une vore di servizis sul teritori e che al seguìs ancje dutis lis lenghis dal MeM. A nô nus mancje une television regjonâl dute in lenghe furlane».
Pocje lenghe di minorance tai grancj events
«Mi pâr di vê capît che i frisons si dan une vore di fâ par inmaneâ events par fâ vignî la int te lôr capitâl. Cuant che o soi rivât al jere un festival metal di trê dîs te place grande, a mieze setemane un altri festival di musiche psichedeliche e ae fin de setemane une iniziative tradizionâl che ogni an e mene une sdrume di int a viodi pipinots une vore grancj che si movin su gruis midiant di cuardis (come lis velis des barcjis). Noaltris in Friûl no vin dute chê densitât di grancj events a Udin, ancje in Frisie, però, come in Friûl, la lenghe e musiche di minorance no son cussì presintis tai grancj events».
Furlan in plen centri storic insiemi a plui di 6 mil lenghis
«Mi à plasût podê viodi in Frisie la lenghe furlane ricognossude intune mostre su lis lenghis feveladis tal mont. In plen centri storic, il furlan presint insiemi a plui di 6 mil lenghis. Un altre note positive e je che i frisons a àn cjapât il titul di capitâl europeane propit cun chest progjet anuâl di interazion fra lenghis locâls e minorancis europeanis. Al sarès biel ancje in Friûl podê sfrutâ in plen il potenziâl european dal festival “Suns”, slargjant la propueste dilunc dut un an di incuintris culturâi, di maniere di podê rindi tal timp ancje Udin capitâl europeane de culture». ❚
Dj Tubet