Grandis ocasions di cressite in gracie
di tancj ospits internazionâi, ma si domandìno
mai trop “furlanis” che a son chestis manifestazions?
Di Istât il Friûl al è plen di festivai e di rassegnis di culture, spetacui e art. Nus puartin achì il mont e par fortune a son sioris di grandis ocasions di cressite in gracie di tancj ospits internazionâi: ma si domandìno mai trop “furlanis” che a son chestis manifestazions?
Par misurâ la atenzion al Friûl si à di partî dal plui “cosmopolitic” dai festivai nostrans, ven a stâi Pordenonelegge (program complet su www.pordenonelegge.it), che chest an al dediche la sô viertidure e un altri event di pueste ae opare di Pierluigi Cappello, il plui grant poete furlan mancjât l’an passât a 50 agns di etât. La scree dal Festival e sarà dedicade ae presentazion dal volum de opare complete dal poete di Scluse, che Rizzoli al à decidût di publicâ (miercus ai 19 di Setembar, aes 6 e mieze sot sere, al Teatri Verdi).
Inte prime zornade dal festival un altri apontament dedicât a un grant furlan: Pier Paolo Pasolini (miercus ai 19 di Setembar, aes 11 e mieze di matine, a Palaç Montreâl Mantiche). Al vignarà presentât il catalic de sô biblioteche personâl (di 3 mil libris) metût dongje dal Gabinetto Viesseux, un mieç fondamentâl par jentrâ intal so procès creatîf scuvierzint i tescj che al consultave e che i coventavin di ispirazion. Un spazi cun Giosuè Chiaradia e Enos Costantini al sarà dedicât ae alimentazion tradizionâl in Friûl (domenie ai 23 di Setembar, aes 4 dopomisdì, a Palaç Klefisch); un incuintri al sarà riservât ancje a savôrs e plasês dal Friûl-Vignesie Julie (sabide ai 22 di Setembar, aes 6 sot sere, a Palaç Klefisch). Un focus al coventarà ancje a fevelâ di Antonia Klugmann, in jurie a Masterchef 2018 (sabide ai 22 di Setembar, a misdì, al Capitol). Spazis limitâts pai nestris scritôrs: Paolo Maurensig al presentarà “Il diavolo nel cassetto”, Enrico Galiano “Tutta la vita che vuoi” e, pe prime volte, a saran publicadis “Le scritture d’arte di Amedeo Giacomini”, tamesadis di Caterina Furlan, Alessandro Del Puppo e Gianmario Villalta. Moments di discussion cun Antonella Sbuelz, Pieluigi Porazzi, Ilaria Tuti. Pôc spazi pe lenghe furlane: ma no je la prime volte… L’unic autôr che al varà la fortune di vê un apontament di pueste al è il brâf Giacomo Vit che al à insuazât 40 agns di ativitât poetiche intun gnûf libri, la antologjie Vos dal grumal di aria (miercus ai 19 di Setembar, aes 9 di sere, li de Loze dal Municipi).
Par cjatâ atenzion ae marilenghe e ae culture furlane si à di spostâsi ai Colonos di Vilecjaze, dulà che di 27 agns Avostanis al met dongje ce che di plui interessant al bol inte cite dai nestris artiscj e inteletuâi. La edizion di chest an e je dedicade a Cappello, che 13 agns indaûr propit alì al veve metût adun 22 poetis intune maratone poetiche che e je deventade un libri: “I colôrs da lis vôs”, un volum che Federico Rossi al à volût cun fuarce tornâ a publicâ. Intal calendari di Avostanis al è stât puest pai 20 agns di cariere di Dj Tubet, pai 25 de fondazion dal Grup Majakovskij (e di gnûf e torne in prin plan la figure di Giacomo Vit) e pe conference dal professôr Franc Fari su “Identitât e violence”. Interessant l’apontament, aromai deventât canonic, cun “Provis viertis di culture furlane”, cun protagoniscj chest an Tullio Avoledo, che al à presentât bocons dal so lavôr li che al imagjine il Friûl di doman (“Furland”, che al jessarà in Otubar par Chiarelettere), Marco D’Agostini e Flavio Pressacco (che a vuelin ricostruî in video la glesie mari di Aquilee), Stefano Giacomuzzi e Giulio Venier (che a àn pensât un viaç di 6 mil chilometris di Pocis di Verzegnis fin a Samarcanda, che al deventarà un film par furlan), Alessandro Monsutti e Stefano Morandini (che a tamesaran la percezion antropologjiche dal nestri confin cu la Slovenie), Alessio Screm e Matteo Venier.
Il gnuf Mittelfest, curât di Haris Pasovic, al à fat spazi a doi progjets (“Ragazzi del ‘99” e “Inzirli”) cul test par furlan scrit di Angelo Floramo. La anime furlane dal prin progjet e je dut câs chê dal mestri Valter Sivilotti, che i à dedicât timp e fuarce no comuns. Il secont al vîf ancje de recitazion di Fabiano Fantini, che e je alc e ce. Biele ancje la interpretazion di Debussy curade dai musiciscj dal Tartini di Triest e dal Tomadini di Udin.
Tante atenzion a interpretis furlans di manifestazions tant che “Piccolo Festival” e “Nei suoni dei luoghi”. E ancje “Udin&Jazz” al à dedicât un tribût a Stefano Amerio che cul so studi di regjistrazion Artesuono al è deventât un pont di riferiment pe musiche di cualitât a nivel internazionâl. Come Glauco Venier, che cul Norma Winstone Quartet al à incjantât il public dal Festival cun “Music for Films”. In sumis, tai festivai furlans il Friûl al è: baste cirîlu ben… ❚
Walter Tomada
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +