Sfuei Mensîl Furlan Indipendent
Archivi de Patrie

LA VÔS DE CISL. Il reditometri

............

Il Reditometri, o aciertament sintetic di gjenar indutîf,  al è il strument che midiant di chel il Fisc al pues stimâ il redit presumût di une persone, su la fonde des spesis che cheste e à fat, midiant di une schirie di indiçs fissâts a priori.
I indiçs doprâts a son coeficients peâts ae “classe” assegnade al contribuent, su la fonde di trê carateristichis:
• composizion familiâr (singui, cubiis cun o cence fîs, monoparentâi);
• etât (fin a 35 agns; 35-64 agns; plui di 65 agns);
• aree gjeografiche (Nord, Centri, Sud).
La moltiplicazion des spesis pai coeficients e puarte ae determinazion dal redit presumût.
Tra lis spesis controladis, no son dome bens di lus tant che avions, yachts o zoiei, ma ancje spesis  comuns tant che il paiament dai asîi nît o di masters universitaris, abonaments ae pay tv o donazions in beneficence. Duncje, dut chel che al puedi meti a lûs une discrepance tra chel che si declare e il propri tenôr di vite.
Lis spesis controladis a saran chês ciertis, che a risultin ae Anagrafe tributarie a non dal  contribuent o di familiârs fiscalmentri a caric. Par esempli, si dopraran lis spesis segnadis dal stes contribuent te declarazion dai redits, ma si fasaran ancje “suposizions” di spesis, doprant elements sigûrs presints in Anagrafe tributarie, tant che potence des machinis, lungjece des barcjis e altris parametris rigjavâts par esempli di analisis dai operadôrs che a partegnin ai setôrs economics.
Il reditometri al esist za dal 1973; tal 2010 al jere stât potenziât e dal prin di Avost dal 2013 al à vude une gnove modifiche.
L’obietîf al è chel di cjatâ fûr lis situazions plui eclatantis, evitant azions “opressivis”.
L’aciertament sintetic al scate dome cuant che il redit complessîf aciertabil (redit presumût) al risulte superiôr di almancul il 20% a pet di chel declarât (te version precedente dal reditometri, chê percentuâl e jere dal 25%).

Ce fâ se e rive la letare dal fisc?

Il control basât sul gnûf reditometri si aplicarà tacant dal an di impueste 2009, duncje dal Model Unic o dal 730 dal 2010, e si fonde su dôs fasis.
La prime fase e je costituide propit de spedizion dal cuistionari cun dentri l’invît a furnî justificazions su lis incongruencis cjatadis dai uficis de Agjenzie des Jentradis.
Il contribuent che al ricêf il cuistionari al à 15 dîs di timp de date di notifiche par rispuindi ae Agjenzie des Jentradis (si pues dut câs domandâ une proroghe dal tiermin di consegne cun richieste motivade al funzionari indicât tal at).
Se il contribuent al da une buine rispueste par convinci il fisc de coretece dal propri redit, il control al pues sierâsi dal moment cu la archiviazion dal procediment.
La seconde fase e je costituide dal aciertament vêr e propri. Se lis justificazions dadis dal contribuent no saran stimadis buinis dal Fisc, di fat si instaurarà un vêr e propri contraditori cu la cuantificazion dal plui alt redit aciertabil e des plui altis impuestis, e la propueste di adesion/paiament.
In fase di contraditori, i spiete al contribuent di furnî la prove che lis spesis sostignudis tal periodi di impueste a son stadis finanziadis cun redits diviers di chei che si à o cun redits legalmentri escludûts de formazion de base imponibile.
Al sarà ancje pussibil dimostrâ che lis spesis ciertis atribuidis a àn un totâl diviers o che a son stadis sostignudis di altris sogjets.
I contribuents a puedin prevignî i efiets dal reditometri doprant “Redditest”, un software de Agjenzie des Jentradis che al covente par discuvierzi se il propri tenôr di vite al è coerent cun chel che al è stât declarât al Fisc. Il Redditest al è dal dut anonim e si cjate sul sît de Agjenzie des Jentradis. ❚
Mariannina Rocco
Responsabile fiscâl dal CAF CISL di Udin

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +