La lenghe e la identitât furlane a son stadis tra lis vitimis principâls de Zonte Tondo, che par cinc agns e à ignorât lis leçs di tutele de Regjon che e aministrave e dal Stât, i principis costituzionâi de Republiche e che in sostance e à blocât la politiche linguistiche che si veve inviât cun tante fadie. Cence gnovis leçs, cence grant scjas: al è bastât meti pastoriis burocratichis, inventâsi cavîi statutaris te Arlef, la Agjenzie Regjonâl pe Lenghe Furlane, nomenâ personis debilis o sotanis tai puescj clâf cul efiet di gjavâ il respîr a dut ce che di bon al jere stât fat dal 1996 indevant.
Cussì dopo cinc agns di aministrazion dal Centridiestre, la planificazion pe lenghe furlane e je un ricuart lontan, la Arlef e je une struture blocade, cuntune direzion carente, tante burocrazie e risultâts dal sigûr insuficients.
Magari cussì no, però, si viôt che ancje pe Zonte Serracchiani la lenghe furlane no je une prioritât: dopo sîs mês des elezions che par fortune no àn riconfermât Renzo Tondo, il centriçampe al à ancjemò di cjapâ at des sôs responsabilitâts e di sodisfâ i acuardis preeletorâi cun Un Friûl Diferent, che a domandavin ancje un mudament clâr te politiche linguistiche in Friûl.
Al di là di un mudament clâr, che al domande dal sigûr un sfuarç che si misurarà in timps plui luncs, al da di maravee che si ritardi tant lis nominis dal gnûf president e dal CdA de Arlef: i responsabii dai uficis preponûts ae lenghe furlane a son ancjemò in dì di vuê chei sielzûts de vecje zonte di centridiestre, coresponsabii dal stagnament che al è stât e che cumò, cul fat di jessi in scjadince, a àn une scuse in plui pe lôr imobilitât.
Alessandro Carrozzo
Luca Peresson
puartevôs di Un Friûl Diferent
AL RISPUINT IL DIRETÔR
Dopo 6 mês ” Un Friûl diferent” al fâs sintî une vôs critiche tai confronts di chê Serracchiani che al invitât a votâ. O publichìn la lôr note sperant di sentîju ancje su altris cuistions, no dome lis cjadreis de Arlef: par esempli, su eletrodot, provinciis, furlan a scuele e vie indenant. ❚ ✒ D.V.