E je a plen regjim la seconde fase dal progjet interreg “La Via della Musica/Strasse der Musik” che al met in comunicazion tieris confinantis, o ben Italie e Austrie, midiant de musiche. Tal specific, si fevele di Cjargne, Valcjanâl e Carinzie, par une comunion di intenzions che e ponte a valorizâ i patrimonis comuns che a cjatin tante empatie intal cjamp de art. In graciis di un acuardi inmaneât tra la Uti de Cjargne, il Comun di Malborghet Valbrune, la Fondazion Luigi Bon e la associazion austriache Via Julia Augusta, inte suaze dal progjet Interreg Italie-Austrie 2014-2020, la vie de musiche e continue a pandi esperiencis e cognossincis.
Daspò dal prin moment svilupât l’Istât passât – che o vin bielzà contât e che al à viodude la costituzion de Orchestre Zovanîl Alpine HEurOpen cun cuarante zovin musicist di diviers Paîs di Europe – a partî dal Autun a son tacadis une chirie di ativitâts didatichis intes scuelis de Cjargne, dal tarvisian e de Carinzie, cu la partecipazion di grups musicâi transfrontalîrs, par lezions insolitis che a metin la musiche e diviers artiscj professioniscj a disposizion dai students. Lezions conciert imbinadis cun concierts vierts al public, par une sinergjie tra istruzion e divulgazion che e cjape dentri sedi istitûts scolastics, sedi lûcs sociâi vierts a ducj tal non de art.
Il prin di chescj apontaments al è stât in Setembar, cuntune lezion conciert dople pai students dal Liceu pai sports invernâi Bachmann di Tarvis e cul conciert public al Museu Etnografic di Palaç Venezian a Malborghet. Protagonist l’ensemble di musiche antighe Collegium Pro Musica, par incuintris leâts ae musiche taliane dal periodi Baroc.
Il secont incuintri tra musiche e didatiche dal progjet european al è stât di Invier, a Tumieç, tra i students de scuele medie a orientament musicâl Gianfrancesco da Tolmezzo e la gnove Istituzion Musicâl e Sinfoniche dal Friûl-Vignesie Julie, che e à tignût – in plui de lezion – un gran conciert tal Domo di Tumieç, cu la partecipazion dal violinist solist Christian Sebastianutto e sot de direzion di Paolo Paroni, ducj i doi musiciscj furlans di grande nomee.
Il tierç al è stât in Austrie, tal mês di Novembar, te Musikmittelschule di Kötschach-Mauthen cul trio Phantastikus, componût di trê famôs armoniciscj: Otto Lechner, Paul Schuberth e Bartok Bibic, che la sere si son esibîts intal teatri de citât.
Il cuart, a Malborghet, al à viodude la presince dal grant portent Edgard Walton, un fantat di tredis agns de Australie che al à vint une vore premis mondiâi leâts al violin, e no par ultin il concors internazionâl di San Vît al Tiliment “Il Piccolo Violino Magico”. Al è stât un moment di grande emozion e di impression – pai students dal Liceu di Tarvis e par dut il public de mont -viodi e sintî chest fenomen des cuatri cuardis menâ l’archet tant che un mestri consumât par esperience, tra composizions di Mozart, Beethoven, Bach, fin ai grancj romantics tant che Mendelssohn, e a musiciscj dal Nûfcent come Milstein, Kreisler e Waxman.
In Fevrâr si è tornâts in Cjargne, tra la scuele medie di Tumieç e il Comun di Darte, par un apontament dopli te dì di San Valentin, in rose. Ospitis dôs musicistis straordenariis: la violonceliste australiane Melissa Coleman e la armoniciste austriache Heidelinde Gratzl. Te buinore e je stade la lezion conciert, cetant partecipade, invezit la sere – tal salon di Palaç Savoia a Darte – al è stât fat un conciert public su pagjinis di musiche contemporanie, folk e contaminazions.
Di chi in Otubar, a son in cantîr altris incuintris tra scuelis e salis di conciert, par une formule che e plâs une vore ai students e a la int. Ai 21 di Març a Malborghet, dentri de cunvigne internazionâl dedicade ae musiche antighe “A Colpi di Tasto”, students e public a varan la pussibilitât di cognossi di dongje struments tant che la viole di gjambe e il clavicembal, spiegâts e sunâts di doi esperts come Teodoro Baù e Andrea Buccarella.
Invezit, ai 17 di Avrîl intal Teatri di For di Avôtri, la cjantante furlane Elsa Martin e il percussionist Andrea Ruggeri a presentaran il conciert spetacul “A-lèn-u, di len e di flât”, ispirât a personaçs imagjinaris, fantastics e mitologjics de Cjargne, par une storie dute di contâ e di sintî e che a metarà in contat students di Davâr, Comelians, Fors di Avôtri e Sapade. L’ultin apontament di cheste impuartante aventure che e lee didatiche e divulgazion musicâl tra Cjargne, Valcjanâl e Carinzie, al sarà in Otubar in Austrie. Daspò e sarà la volte de ultime fase dal progjet “La Via della Musica/Strasse der Musik”, ven a stâi une publicazion bilengâl in talian e todesc di trê studis dedicâts ae valorizazion de art figurative e musicâl des tieris confinantis. Ma di chest, o contarìn plui indevant. ❚
