Sfuei Mensîl Furlan Indipendent
Archivi de Patrie

Un 2020 disastrôs pes machinis agriculis

Adriano Del Fabro – diretôr dal bimestrâl “SoleVerde”

In F-VJ, si son sbassadis sot de medie taliane
lis venditis di tratôrs e di rimorchis

In Friûl-VJ e in Italie, l’an 2020 si è sierât in negatîf pal marcjât des machinis agriculis, cuntune emergjence sanitarie che e à condizionât i invistiments pal acuist di mieçs gnûfs.
◆ I dâts su lis imatricolazions talianis a segnin une diminuzion pai tratôrs dal 3,4% a pet dal 2019, in reson di 17.944 unitâts; lis trebiis a segnin un câl dal 2,6% a front di 302 unitâts, e i rimorchis a sierin cuntun passîf dal 12,1% (-20,6% in Friûl-VJ), par un totâl di 7.862 unitâts. Dal dut in linie cul dât dal 2019 a risultin lis imatricolazions di tratôrs cun scjalâr di cjame (Friûl-VJ includût), che a sierin cun 564 unitâts, cuntune variazion dal +0,2%. Uniche tipologjie che e presente une incressite des imatricolazions e je chel dai solevadôrs telescopics, che a confermin l’andament positîf dai ultins agns, segnant une cressite dal 6,3% (956 unitâts, e di chês 15 in Friûl-VJ, par un +25%).
◆ Il recupar di fin dal an
La analisi dai dâts mensîi, però, e evidenzie recupars une vore fuart intai ultins doi mês: lis imatricolazions di tratôrs a àn segnât in Novembar une impenade dal 38,5% a pet dal stes mês 2019, e une altre cressite dal 38% in Dicembar, permetint un recupar dai volums di vendite e duncje une riduzion dal passîf. I tratôrs cun scjalâr di cjame a àn regjistrât une cressite di plui dal 43% in Novembar e di cuasi il 38% in Dicembar, fat che al à permetût – cemût che si à dit – di rivâ ai stes totâi dal an prime. I rimorchis a àn recuperât ponts percentuâi in graciis des incressitis dal 6% di Novembar e dal 20% di Dicembar, intant che ancjemò plui scjassose e je la cressite pes trebiis (tor dal 200% intai ultins doi mês), ancje se a front di un numar di unitâts une vore limitât e duncje pôc significatîf sot dal profîl statistic. Il risultât positîf otignût intal segment dai solevadôrs telescopics, infin, al è di assegnâ ancje chel in buine misure al andament des venditis intai ultins doi mês (in maniere rispetive +81% e +25%).
◆ La incressite  des imatricolazions ae fin dal 2020 e podarès anticipâ une fase di riprese – ancje in virtût dal rinovament dal credit di impueste pal 2021 – destinade a caraterizâ i prins mês dal gnûf an. L’andament dal marcjât al reste dut câs subordenât ai efiets de pandemie che e continue a pesâ tant che une grave incognite sui setôrs produtîfs. Dentri dal trend gjenerâl, dut câs, si notin andaments diviers di regjon a regjon, dovûts in part ai mecanisims locâi di finanziament pal acuist des machinis e aes cundizions des impresis agriculis intes diferentis realtâts. Intal belanç di fin dal an, cualchi regjon impuartante e à patît, pai tratôrs, une diminuzion di venditis plui grande di chê dal dât medi nazionâl (Emilie Romagne -34,3%, Friûl-VJ -21,4%, Venit -9,7%, Lombardie -8,9%), intant che altris regjons, simpri tra chês di plui pês intal marcjât de mecaniche agricule, a àn sierât fintremai cun incressitis significativis (Piemont +24,6%, Pulie +9,1%, Sicilie +5,5%). ❚

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +