Nelso Tracanelli, Di là da l’aga, Udin, 1987

“Na stangja di un metro e novanta, doi slefars di peis ch’a j voleva il 48 di scarpis, ‘na tonia ch’a tigniva ingrumâs quatru guès: Pre Meni. Dopo jessi stât capelan dal Gorc e vê fat pal paîs di cjan e di lôf, cambiada chê capelania in parochia, i capus-famea a’ vevin sielzût un altri come plovan e pre Meni al si era ritirât a Tisana ta ‘na famea di amîs, cu’n displasê ch’a j durât par duta la vita”
◆ Lis storiutis di Nelso a descrivin un mont di miserie nere: fintremai lis surisutis a saltin fûr de panarie cu lis lagrimis intai voi. Un mont disfat de prime vuere mondiâl, e piês ancjemò, de seconde: un paîs ‘bombardât, savoltât, scancelât da la cjarta geografica’. Nissune maravee che la int e innei i displasês, la pôre, la disperazion intal vin o inte aghe di vite. O ben, che la fam e sburti a cualchi visite intai cjamps di chei altris a cirî alc di meti sot dai dincj. O, fintremai, a vendi une partide di balon. Bon che al è ancje un Anzu che se cjape cul vuardian che i mene dongje il lari e no cul lari che al jere un frutat plen di fam.
◆ I predis no fasin une gran biele figure: pre Meni nol pratiche il perdon, pre Bepo nol è amì de castitât, il plevan Trombetta al fâs dispiets a siei confradis, pre Pieri, di rabie, al mande a gjambis par aiar une puare femine. Al salve la categorie pre Svualt, sant par vocazion e puar par volontât, che a di un puarin che i veve robadis lis verzis al va a puartâi ancje un doi musets e un toc di ardiel! Intal contest de miserie e scjampe ancje cualchi ridade di gust: al è un che al mangje in blanc, sicu che i à ordenât il miedi, ma che al bêf neri; un altri si cjate, une matine, la puarte di cjase sierade di un mûr di modons; un che al vote par cjossul, ma cjossul nol è in liste, un altri che al à pôre che, stant che dut al cres, no vedin di cressi ancje i chilometris jenfri un paîs e chel altri. E se Sant Roc al fâs dome fente di fâ vignî la ploie, alore Gjovanin al fasarà dome fente di lâ a messe.
◆ Tracanelli al piture une biele schirie di ritrats in cheste seconde edizion dal so libri (passe dusinte pagjinis), scrit inte varietât furlane concuardiese. Un autôr impuartant pe culture furlane di là da la aghe, in plui che pal so valôr specific, ancje par vie che al ricuarde che il Friûl e la lenghe furlane a rivin ancje di là de provincie di Udin e de Regjon F-VJ. E il so comun, S. Michêl dal Tiliment, no lu à dismenteât e al onore la sô memorie (al è mancjât intal 2002) cuntun premi bienâl a lui dedicât. ❚