Tal Avrîl dal 2019, la polizie di Scotland Yard e à arestât Julian Assange, che ca di pocjis setemanis al podarès jessi estradât tai Stâts Unîts.
◆ Ducj a san cui che al è Assange, ma une piçule biografie no fasarà mâl a nissun. Nassût tal 1971 a Townsville, in Australie, Julian al è un programadôr, hacker e gjornalist, cofondadôr dal sît WikiLeaks, nassût par rindi publics documents secretâts, cu la garanzie di no disvelâ cui che ju à procurâts. WikiLeaks al à vût une grande popolaritât tal 2010 cuant che al à metût sù sul sît miârs di cjartis segretis, gjavadis fûr dai archivis in linie de aministrazion militâr, che a rivelin lis angariis dai americans inte vuere in Iraq.
◆ Ancje se tal moment de publicazion il guvier al jere chel di Barack Obama, il scandul al tocjave soredut la aministrazion di George W. Bush, president cetant contestât, che al jere stât clamât a une reazion dopo dai atacs aes Tors Zimulis dai 11 di Setembar dal 2001. Par chest, Assange al è deventât un eroi internazionâl, massime pe stampe di çampe, e par chel mont antagonist che al viôt in lui il paladin de libertât di informazion che no si ferme devant di nuie.
◆ Mieç mont, dut câs, al à viert inchiestis judiziariis su di lui, tacant dal so Paîs, la Australie, e dai Stâts Unîts che lu acusin di spionaç, un reât che in Americhe al pues previodi ancje la pene di muart. E je rivade po ancje la inchieste svedese par violence sessuâl. Lis acusis a son coladis, ma Assange in chel periodi al jere rivât a Londre, e cussì al jere finît ai arescj in cjase. Tal 2012 al jere rivât a scjampâ, cjatant acet inte ambassade dal Ecuador, che i à dât asîl politic.
◆ Intant che al jere ai domiciliârs, Assange al à fevelât cun J. Appelbaum, A. Müller-Maguhn e J. Zimmermann, personis dongje de rêt di programadôrs, hacker e ativiscj che e à creât WikiLeaks. Il libri “Internet è il nemico” al è la trascrizion di chei colocuis. Dal dialic al ven fûr dut il sproc dal pinsîr di Assange, condensât tes peraulis: «privacy pai sotans, trasparence pai sorestants». Par so cont, di fat, la riservatece dai dâts personâi e varès di jessi garantide de critografie, intant che al scientific journalism – fat di informazions di prime man e coments sclagns – i tocje di garantî la trasparence.
◆ Ma cheste maniere di resonâ no je cence consecuencis. Cussì, cuant che tal moment dal asîl, Assange midiant di WikiLeaks al à disvelât che il President dal Ecuador, Lenin Moreno, al veve conts in bancjis forestis, l’Ecuador al à finît di dâi protezion al Robin Hood dal gjornalisim. Intant Assange al à pierdude ancje la poie de çampe internazionâl che lu acuse di vê favorît la elezion di Donald Trump, cu la difusion di documents risiervâts dal partît democratic e de sô candidade Hillary Clinton. Cussì, cuant che i agjents di Scotland Yard a son vignûts a cjolilu, Assange cheste volte nol à cjatât fûr de puarte un grum di partesans in deliri, ma dome pocje int curiose e nuie di plui: la sô stele aromai e somee tramontade.
◆ “Internet è il nemico” (176 pagjinis, editât de Feltrinelli) al è un test pluitost faturôs, ma conseât parcè che Assange al è une des figuris di rilêf di chest inizi dal mileni. Si à simpri considerâ, dut câs, che tancj osservadôrs autorevui a stimin chest om tant che un chel al jere pront a dut par deventâ famôs. Come che al note Mattia Feltri, «al à pensât plui a se stes, ae sô imagjin di purece, ae sô glorie, che no a impegnâsi intun lavôr che al fos util par ducj». ❚