Chest an, Mario De Cillia e Giuseppina Pittino – i fondadôrs di VideoTeleCarnia – a àn vude la sodisfazion di fâ fieste pai 40 agns de lôr television: un travuart fat di sacrificis, di rinunziis, di scombatiments superâts cu la grande passion che di agns a metin intal mont de television.
◆ VideoTeleCarnia e je une piçule emitente che e trasmet di Trep di Cjargne dal 1980; i studis si cjatin intun plan de cjase di Mario, che al dîs: “la sede e je semplice e artesanâl… intun supermarcjât, intun grant spazi tu cjatis cetante robe, sedi di cualitât buine che un pôc plui scarte. Dal oresin, la stanzie e je piçule ma plene di robe di valôr. Chest par dî che nol covente jessi grancj par fâ bielis robis!”
◆ Intune stanzie a son sistemâts cun grande atenzion ducj i imprescj che tai agns si son evolûts (cinepresis, mixers, regjistradôrs…) e l’archivi precîs di buine part dai servizis metûts adun di 40 agns incà. Come che al dîs Mario “O ai dut in ordin alfabetic; ogni tant o voi a cirî il servizi che mi interesse: o voi a man sigure e a saltin fûr robis incredibilis che o vin regjistrât! Cussì, o mandi in onde robe che ti fâs gole!”
◆ La passion di Mario e scomence za a 16 agns cuant che al va cuntun altri a fâ cine te sale comunâl di Trep: al veve il compit di sbobinâ lis peliculis dai films e di fâlis sù tes bobinis plui piçulis dal proietôr, par podêlis proietâ.
◆ La passion e je lade indenant cu la television, dulà che al à rivât adore a tirâ dentri prin la femine Pina, che e à otignût il patentin di gjornaliste, e dopo – cuant che a son cressûts – ancje i fîs Barbara e Gianluca, che vuê a dan ancje lôr une man. “Jo o fasevi l’artesan. Cuant che o rivavi la sere a cjase mi davi une biele lavade e o levi sù disore a regjistrâ i programs. La passion mi gjavave la strachece. Za doi agns prime dal 1980, o vevi tacât a filmâ. O levi a filmâ lis manifestazions dal paîs. La prime prove che o ai fat, e je stade chê di trasmeti de cusine al salot. Dopo, o ai metût un trasmetidôr a Trep e il prin servizi che o ai metût in onde al jere chel di une manifestazion religjose: o ai telefonât a pre Tarcisio par disi di impiâ la television. Imagjiniti tu la sô contentece di viodisi in television, soredut in chei timps che no ‘nd esistevin tantis! Morâl de storie, o vin scomençât cussì a trasmeti a Trep; dopo o vin zirade la antene su Paluce, ma il segnâl al jere flaput e cussì o vin metût il ripetidôr ancje li; e po dopo o ‘nt vin metût un ancje a San Pieri di Zui. Intant e je nassude la television Video Strega a Çurçuvint, e o vin tacât a lavorâ insiemi par tancj agns. In chest mût, o rivavin a cuvierzi cui nestris programs diviers comuns cjargnei de nestre zone, fin tal 1984. Dopo, o vin fat un salt di cualitât podint jentrâ intes cjasis di Paulâr, e o vin potenziât il segnâl di San Pieri, rivant fin aes primis cjasis di Tumieç. Tal 1990, e je saltade fûr la leç Mammì ma jo o vevi za cjapât contats cun Telefriuli che si è dimostrade dal moment disponibile par une colaborazion. In gracie di une autorizazion, e di une postile de Leç Mammì, si trasmeteve in contemporanie tal stes teritori nô e Telefriuli. Tal 2011 al è rivât il digjitâl e o vin vude la concession par podê cuvierzi cul nestri segnâl dute la regjon.
Sul imprin, o trasmetevin di lunis, di miercus e di sabide, cun pôcs colaboradôrs: la mê femine, gno fi, mê fie, e dopo planc a planc a son vignûts dongje altris. No sai dîti trope int che e je passade achì! In chei timps, la tv e jere une novitât: cumò e je cuasi une robe normâl. La television e jere une robe impuartante, e vignive acetade, la int e deventave mate pe contentece se si faseve une interviste. Nus à compagnât simpri tant il preseament de int che in ore di vuê, in gracie ancje di internet, nus viôt in dut il mont!”
◆ A VTC si fevele di atualitât, di musiche, di culture, di storie des piçulis comunitâts di mont… Cuarante agns di television par contâ la anime e la storie de int di Cjargne: une presince di incontestabil valôr antropologjic, storic, documentaristic, sociâl e culturâl. Une television libare di leams politics che si pues seguî su canâl 690 dal digjitâl terestri, in internet sul sît www.videotelecarnia.it, e inmò su youtube, e tes pagjinis facebook e instagram. ❚
________________________
SCHEDULE
◆ Tal 2011 al rive il digjitâl terestri: la Associazion VideoTeleCarnia (nassude tal 2003 di supuart ae emitente) e oten la Autorizazion Ministeriâl tant che “Furnidore di servizis di media audiovisîfs e dâts” e il ricognossiment di television comunitarie; il so segnâl al rive in dut il Friûl-V.J. sul canâl LCN 690, marcât VideoTeleCarnia, par mieç dal distributôr di rêt Telefriuli che al veicole tal propri multiplexer i siei programs.
◆ Oraris di trasmission: ogni dì, cun lis dôs fassis des 12.00 aes 14.30 e des 18.00 a la 01.00/02.00.
◆ Colaboradôrs: diretôr responsabil Alberto Terasso, e une lungje la liste di personis, dutis volontariis, che in 40 agns a àn regalât professionalitât, passion, impegn, fantasie, gjenuinitât, dant vite a chel grant mosaic di propuestis insedadis te programazion di VTC.
◆ Programs: di ogni sorte, cuntun voli particolâr ae tiere di Cjargne, documentant cunvignis e manifestazions, organizant dibatits in studi cun ospits su argoments culturâi, economics, di atualitât e v.i., e metint in lûs i aspiets tipics e lis ricjecis di storie, lenghe, usancis e tradizions.
◆ Dal 1980, VTC e à garantît – cuntun trop di volontaris – la informazion, lant a cuvierzi il vueit lassât di cui che al varès vût di vê tant che finalitât il dovê di difindi propit i piçui e i debii. Une vôs scomude, libare di peams politics e di condizionaments, e forsit par chest pôc considerade de plui part dai aministradôrs e politics locâi che, ancje se a àn usufruît plui voltis dal so servizi, no capissin e a fasin fente di no cognossi il sfuarç finanziari cuotidian che cheste presince e domande. ❚
