La specialitât no dome nus covente par aministrâsi ben, ma ancje par sfrutâ la gnove posizion gjeopolitiche de Regjon

Lis declarazions dal President de Regjon Toscane su lis Regjons Speciâls a sunin ofensivis pal Friûl-Vignesie Julie e a alimentin ancjemò di plui chê voie di neocentralisim che e je daûr a lâ za in grant.
Come se nol fos propit dal faliment dal centralisim che si è gjenerade chê sburtade federaliste che, par altri, e je restade irealizade.
A dîle dute, ancje la nestre Regjon no à decentrât i propris podês e si è tignude ben strente “la borse” a discapit di chei altris nivei aministratîfs.
La specialitât e riclame temis storics, economics e politics e argoments tant che la teritorialitât, la autonomie, il federalisim e la identitât.
Su la Autonomie Speciâl de nestre Regjon, o stimi impuartant sotlineâ ciertis cundizions essenziâls pe sô stesse reson di esisti.
Par prime robe, e va rimarcade cun fuarce la coesistence di plui lenghis e identitâts.
Pluriculturalisim, duncje, di promovi.
O soi dacuardi cu la conseire regjonâl Alessandri Colautti cuant che e dîs di no capî cui che si sdegne pai tais ae culture e si dîs, invezit, dacuardi cui tais al insegnament de lenghe furlane.
Parcè, il furlan no ise culture?
Al è determinant ancje il posizionament gjeopolitic economic dal Friûl-VJ. Intal passât la Regjon no jere apetibile e interessante, pe economie, par vie de vicinance cui paîs comuniscj.
Cumò e je simpri prossime ai stes Paîs che a son i nestris simpri plui motivâts gnûfs concorints e contindints ma a rapresentin ancje potenziâi gnûfs marcjâts.
La gnove colocazion tal centri de Europe e va fate rindi. La Regjon e pues jessi une crosade determinante intai flus dai oms e des marcjanziis e chest al puartarès beneficis economics aes comunitâts locâls.
Duncje, e va miorade e coordenade la portualitât, fat deventâ plui eficient il sisteme feroviari e doprât a plen l’as Adriatic-Baltic (Pontebane). Il posizionament de nestre regjon al è une “unicitât” di valorizâ e al è pardabon une esclusive dal Friûl-VJ.
E je impuartante ancje une gjestion aministrative virtuose, come che al è stât par decenis.
Intal ultin periodi, però, nol è stât propri cussì ancje se, dut câs, e je lade tant miôr che in altris Regjons, sedi ordenariis che speciâls.
No son propit il massim de virtuositât sedi il sviliment des partecipadis regjonâls che la cjare e no finide cuistion dal Compart Unic. Lis partecipadis a àn di cjatâ fûr une mission che no sedi la autoconservazion semplice, tornant a jessi buinis pes impresis e pai citadins.
Cence altri, e va fate une riforme istituzionâl e aministrative che e agreghi (no che e fondi) i Comuns in areis largjis, plui largjis di chês previodudis, par delegâur compits e risorsis.
I nivei sub regjonâi, duncje, adeguâts par dimension e funzions par evitâ il tramai dal neocentralisim regjonâl.
A van valorizadis lis professionalitâts dai nestris dipendents publics ancje midiant chê mobilitât, dal sigûr contratade, rindude pussibile propit dal Compart Unic.
Ancje se dut chest, e altri ancjemò, al fos fat, nol sarès dut câs suficient par mantignî la nestre specialitât parcè che par contrastâ cheste gnove derive centraliste (ancje autoritarie e oligarchiche?) al è pardabon necessari che i atôrs politics, economics e sociâi regjonâi a sedin dutun, unîts e solidaris.
Dome cussì o podarìn fâje. ❚
Roberto Muradore
Segretari Gjenerâl Cisl di Udin