Sfuei Mensîl Furlan Indipendent
Archivi de Patrie

E se la Danieli e decidès di lâ tal forest “a la Marchionne”?

............

I solits ben informâts a disin che Gianpietro Benedetti, president de Danieli, al sedi restât cetant rivilît de domande di rimant a judizi puartade indevant de Procure de Republiche di Udin a cjame sô e di altris sîs dirigjents dal Grup par evasion e fraude fiscâl par un totâl di 281 milions, cun plui o mancul 80 milions di impuestis no paiadis, midiant un di chei câs che a vegnin definîts “esterovestizion societarie”. Dal rest, za tai agns 1989-1992, il Grup di Buri al jere finît inte smire de Agjenzie des jentradis par altris reâts finanziaris prossumâts, une acuse su chel che i disin dividend stripping (une modalitât alternative di incassâ il divident, fasint une plusvalence), contenziôs che di chel al jere jessût vincidôr dopo cuasi vincj agns, podint cussì “diliberâ”, intal belanç 2010, cuasi 76 milions di euros che al veve metût a risierve in vie cautelâr.
SENARIS
Fin chi i fats. Cumò fasìn un zûc e provìn a imagjinâ un senari futûr. Vâl a dî: e se devant di cheste situazion di inciertece normative che e puarte a inchiestis e contenziôs, la Danieli e sielzès di puartâ la proprie sede tal forest? Di timp, Benedetti al sosten ciertis posizions che a son stadis intai ultins timps trasformadis in realtât di Sergio Marchionne, deus ex machina de Fiat, tant che i incentîfs salariâi leâts ae produtivitât e al risultât societari, par esempli. E il fat che la Danieli e sedi aromai une multinazionâl, ancje se “in formât di sachete”, al podarès judâ chest dissen. Cjapìn in considerazion, tra chês altris robis, che la Danieli e à presentât intes setemanis passadis une ufierte pe acuisizion di Finmeccanica di dôs societâts controladis, la Fata Epc e la Fata Hunter, ativis intal setôr de lavorazion dal alumini, compatibile cun chei che a son i orientaments plui resints, in teme di “core business”, dal Grup di Buri. La Fata Hunter e à une sede ancje intai Stâts Unîts. O imagjinìn alore, un senari “ae Marchionne”. La Danieli e rive a acuistâ la Fata e, compagn di chel che e à fat la Fiat cu la Chrysler, e decît di fondi lis societâts e di movi la sede legâl. Dulà? Cence vê di fâ masse sfuarçs di fantasie, lant daûr in maniere vuarbe al “model Marchionne”, la sede legâl e podarès jessi puartade a Amsterdam (la variante e podarès jessi rapresentade dal Lussemburc, dulà che la Danieli e je presinte za di tancj agns cuntune controlante), il domicili fiscâl a Londre e la cuotazion in Borse e podarès jessi suntun cualsisedi marcjât; che al sedi il New York Stock Exchange (Wall Street) o un altri, pôc al impuarte, intant che e podarès dut câs vignî mantignude la cuotazion secondarie a Piazza Affari di Milan. Ma il trasferiment de Danieli, che al sedi clâr, al podarès dut câs sucedi cence tignî cont de acuisizion di Fata, ma dome su la base di calcui precîs di convenience economiche. La uniche robe cierte e je che al pâr dificil che chest al sucedi prime che la inchieste inviade de Procure di Udin e rivi al tiermin. Ma dopo la sentence, cualsisedi che e sedi…
IL “MODEL MARCHIONNE”
A chest pont al è però di fâsi une altre domande. Ce sucedaressial se pardabon il “model Marchionne” al vignìs aplicât ancje ae Danieli? Tignìn cont che al è un grup che al rapresente plui dal 30% dal trafic in esportazion di dute la provincie di Udin, che al conte cuasi trê mil dipendents sul teritori (che si calcoli la sole Abs, tra lis principâls produtoris di açâi speciâi di Italie) e cuntun indot che al di almancul trê voltis tant (dai servizis, ae logjistiche, ai traspuarts). La pierdite di butade che e derivarès pes cassis di Stât e Regjon no sarès duncje di pôc cont e di sigûr e varès un impat impuartant sui conts publics e sui servizis. Par cumò, fintremai che la inchieste e je in cors, ogni decision e somee che e sedi destinade a jessi conzelade. Ma, ae fin, e soredut se il verdet al sarà ancje cheste volte favorevul ae Danieli e se, intant, de bande dal Guvier no intervignaran misuris che in cualchi mût a laran a favorî il restâ in Italie des societâts, un trasferiment al somee tant, tant probabil. Scomençâ a cjapâ in considerazion cheste ipotesi, cussì, almancul tant che câs di studi, no sarès une idee strambe… ❚
Linux

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +