Sfuei Mensîl Furlan Indipendent
Archivi de Patrie

La prime de trilogjie pe Unesco dal côr virîl furlan cun cjase a Rude

Alessio Screm
FABIANA NORO e il côr di rude

Al ven fûr un video musicâl su lis bielecis
di Acuilee su musichis di Renato Miani

Il Côr Polifonic di Rude, une siore realtât musicâl dal Friûl che e pant la sô vôs in dut il mont (si cognossin ben i primâts e lis tantis vitoriis in concors internazionâi de corâl furlane direzude di Fabiana Noro), al scree un gnûf progjet che al vûl meti in vôs i patrimonis Unesco dal Friûl-Vignesie Julie. Une iniziative no dome sonore, musicâl e narative, ma ancje visuâl, stant che ce che si podarà scoltâ, si podarà ancje viodi. Videos musicâi insome, fats benon, che a contaran di Acuilee, Cividât e Palme, e il prin al è bielzà realizât. Al larà in onde juste la vee de Fieste de Patrie, su Rai 3 FVG, domenie ai 2 di Avrîl aes 9.15, e in repliche miercus ai 5 di Avrîl su Rai 3 Bis aes 21.20.
◆ Une biele scuadre e met insiemi chest progjet, cun musichis componudis biel a pueste di Renato Miani su tescj gjavâts des sacris scrituris, inserts di Sant Cromazi e parts scritis di Angelo Floramo, che al vuide ancje la introduzion, in plui che leturis presentadis in forme recitade. Sostignût di un pianoforte a cuatri mans, sunât di Ferdinando Mussutto e Matteo Andri, cu lis vôs maschîls di Rude direzudis di Fabiana Noro, la partecipazion de atore Aida Talliente e de cjantante Elsa Martin, il prin cuadri di cheste trilogjie si clame “Genesi”. A curâ lis ripresis e je Arte Video, la regjie e je di Marco Fabbrio e la supervision audio di Stefano Amerio. In sumis, un lavôr dut furlan, contemporani, tal cûr de furlanetât che e je Acuilee, antighe scune de nestre identitât.
◆ Si viôt la Basiliche maraveose di Sante Marie Assunte, di dentri e difûr, cun ripresis aeriis fatis cuntun dron, e detais di diviers ordin a esaltâ lis sôs unicitâts. Si sintin lis vôs virîls movisi cun gracie su melodiis e armoniis che a san di discjant e che a cjapin la vie de polifonie a cuatri vôs, e che si alternin cu lis sugjestions de leture e di un cjant moderni par parts rindudis di vôs femininis. Dut daûr de maestrie de diretore Fabiana Noro che e lei cun elegance savinte lis notis di Renato Miani, caladis inte profonditât di une tradizion che e met in lûs un tesaur sot dai profîi di une storie atuâl.
◆ Si viôt ancje il patrimoni dal Museu Archeologjic Nazionâl, lis statuis, lis ampolis dai profums de ete antighe, lis lapidis, lis bilisiis, intun paradîs di cromiis tra i mosaics dai paviments musîfs, lis colonis, lis arcadis de Basiliche, i frescs des criptis e i bens espositîfs dal Museu, lis iscrizions e lis lapidis, a instreçâ une storie traviers di une sielte di sunôrs.
◆ La storie e je dividude in trê cuadris. Il prin si titule “Nel segno di Giona” e al conte de sô storie, voltade in musiche cjapant ispirazion des figuris dai mosaics in ambientazion marine, che a contin la liende dal profete clamât di Diu. Il secont ,“Pluvia Celestis”, si concentre su une des storiis tra lis plui inmagantis che nus vegnin de Decima Regio. Chel de mime e atore Bassilla, balerine orientâl rivade, e daspò muarte, a Acuilee, che e à tirât il so ultin respîr intant di un spetacul. Le clamavin la Decime Muse, amade e amirade; e jere ancje acrobate, e tal so non plui di cualchidun al viôt la origjin dal tiermin “bassilâ/bacilâ”, ven a stâi “stâ in ecuilibri”, “ondulâ”.
◆ E recite la iscrizion de famose lapide sul so cont, che si cjate tal Museu di Acuilee, voltade achì juste un tocut par furlan: “Ae mime Bassilla, decime Muse, Eraclide, atore valide inte declamazion, si poie cheste stele. Ancje di muarte e à vût un onôr compagn di chel che e veve in vite, parcè che il so cuarp al polse intun teren sacri aes Musis. I tiei coleghis ti disin ‘Sta di anim bon, Bassilla, nissun al è imortâl’”. E je propit su la sô muart e sul so mît che si concentre cheste produzion dal Côr Polifonic di Rude, dant continuitât a une figure che e cjate inmò cumò tancj passionâts.
◆ Il tierç cuadri, chest titulât ancje in origjinâl par furlan, “Il Svol di Bassilla”, al è la continuazion de leture recitade di Aida Talliente dal cjapitul precedent e si môf daûr dal cjant di Elsa Martin, intun miscliç che al alterne une recitazion compagnade e un cjant di savôr moderni, cu lis parts corâls di ande ancestrâl, sieradis di “Cum Rex Gloriae” tal contrast di une ambientazion noturne des ripresis.
◆ Mestri il lavôr compositîf di Renato Miani, che al va di là de estetiche di une scriture culte e complesse, di savôr dodecafonic, o atonâl o ancje politonâl come che nus veve ben usâts, a pro di une leture rivisitade e atualizade de tradizion musicâl furlane sacre discjantiche paleocristiane. Tradizion di dulà che diviers a viodin ancje il disvilup, plui in là o di une ete indulà che sacri e profan no vevin lis diferencis che o din cumò, dai cjants e des ricetis che forsit cun masse abitudin nô o clamìn, in maniere masse gjeneriche, vilotis. Spirituâl e temporâl intai pentagrams di Miani, dâts dongje in “Genesi”, a dan la fuarce di une unitarietât che si le cjate ancje dentri de comunion di latin e furlan, che lui al dopre e che al misure su lis cuardis a cuatri mans dal pianoforte e su lis vôs cjaldis di chei di Rude. La musiche no fâs ciert di sotfont aes secuencis visivis, invezit al sucêt il contrari: la musiche e fâs di parone ae sene e lis unicitâts che si viodin, bielzà chês cence paragons, a vuadagnin in esclusivitât, a vibrin di une lûs gnove.
◆ In sumis, o sin ben usâts a viodi in varie maniere il patrimoni paleocristian inestimabil di Olee, come che par antîc si clamave par furlan la metropoli de Decima Regio, ma cussì inmò nol jere stât fat, e un preseament al va ae corâl di Rude e a ducj chei che a àn partecipât cu la lôr bravure e professionalitât. Come che o disevi, chest al è il prin di un progjet multiformi, e di fat a seguiran i cuadris dedicâts a Cividât e a Palme, cun protagoniste Fatma di Bosnie, sclave impresonade inte fuartece di Vignesie. Duncje, une opare articolade che si configure tant che “in vore” e che e impegnarà Fabiana Noro e il so côr pai prossims timps.
◆ E reste simpri ative la formazion vocâl di Rude che e partecipe a concierts e a diviersis iniziativis pardut, come lis ospitadis e lis partecipazions a iniziativis di nivel alt dentri e fûr dal Friûl e de Italie, la promozion di rassegnis di musiche corâl – la ultime, “Cuaresime in musiche” – e produzions discografichis, tant che il cd di prossime jessude, regjistrât pe famose etichete internazionâl “Brilliant” e dedicât al compositôr dal Liechtenstein Joseph Gabriel Rheinberger (1839-1901). Ducj i inzornaments su lis ativitâts dal Côr Polifonic di Rude a son sul sît www.ilpolifonico.it. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +