Sfuei Mensîl Furlan Indipendent
Archivi de Patrie

La pôre dal bosc e i popolaments urbans di uciei

Gianluca Rassati
Cemût che no si àn di taiâ lis plantis

La pôre dal bosc e à lidrîs profondis e si è inseride a fuart intal anim uman. Probabilmentri chest sintiment al è nassût cuant che l’om al à tacât a vivi in insediaments stabii che, intal timp, di piçui vilaçs a son deventâts simpri plui grancj, fin a rivâ in dì di vuê a aglomerâts urbans cun milions di personis.
◆ Ancje i antîcs Romans, pûr vint intal mît de fondazion elements che a vegnin de “silva” tant che Rea Silvia e la love, a vevin sintiments di ostilitât pai boscs che a consideravin sîts di barbarie, in cuintriposizion ae civiltât che si cjatave intes citâts.
◆ Intal timp, chest gjenar di disposizion si è mantignude cjapant diviers significâts, par esempli Dante al à scrit di une “selva oscura” dulà che “la diritta via era smarrita”. In chest câs, pûr cun significât e valence divierse a pet di chê dai antîcs Romans, la “selve” no jere dal sigûr un element positîf.
◆ Intal secul passât, l’inurbament al è stât un fenomen di grandis proporzions che al à puartât, sul tacâ di chest, a fâ in mût che plui di metât de popolazion umane mondiâl e vivès intes citâts o, dut câs, intai aglomerâts urbans. Cheste tindince e je ancjemò in vore.
◆ Naturalmentri chest al à puartât a un slontanâsi ancjemò plui evident des personis dal mont naturâl, che al à confermât i sintiments che si à dit parsore, ancje se a son pôcs, in efiets, chei che a ’nd àn cussience.
◆ La seconde metât dal secul XX e je stade caraterizade de diminuzion des popolazions umanis alpinis. A chest si è zontât un slontanâsi progressîf dai zovins dal mont rurâl. Chest al à gjenerât, midiant di un procès di cause efiet, il bandon des ativitâts agriculis, silviculis e pastorâls, e la pierdite di contat cu la realtât, cumò trasformade de vision promovude dai mieçs di informazion, dispès gjestîts di personis lontanis dal mont contadin e montan.
◆ A son cussì “passâts” concets che a puartin a une vision catastrofistiche de espansion dal bosc (che si sta verificant in consecuence di ce che al è ripuartât parsore) che e ven rapresentade tant che pussibile fagocitadore dai paîs di mont. Chest, insiemi cuntune diminuzion de “tolerance” pal mont naturâl (par esempli, lis fueis par tiere di Atom), al à provocât une sorte di “selvifobie” che e à produsût un acaniment cuintri des plantis che si cjatin tai aglomerâts urbans.
◆ Lis plantis, ancje dentri di paîs e citâts, a son dopradis dai animâi par cjatâ di mangjâ, polsâ, riprodusisi e, in cierts câs, a son fondamentâls pe lôr presince e pe sorevivence.
◆ Tignint in considerazion ducj i aspiets evidenziâts e su la fonde di ce che al è sucedût intal timp inte mont furlane, l’autôr al à volût verificâ ce efiets che a àn vût i intervents su lis plantis inte aree urbane plui grande, chê di Tumieç.
Il studi al à tocjât i uciei nidificants e al à compuartât un confront temporâl: i dâts a son stâts cjapâts sù par dôs stagjons riprodutivis, sedi ae fin dal secul stât che une cuindisine di agns dopo.
Par fâ il confront temporâl al è stât doprât un metodi standardizât che al previodeve di fâ un percors dentri de aree di studi.
◆ Intal timp cjapât dentri fra i doi periodis dulà che a son stâts fat i rilêfs, diviers vecjos arbui a son stâts taiâts (ancje par vie di ristruturazions di vari gjenar e di ampliaments e realizazion di oparis edîls), e tancj altris, massime di proprietât publiche, a sono stâts dispedâts in maniere une vore pesante. Cheste ultime azion e à provocât la muart di altris plantis: in totâl e je stade stimade une diminuzion dal 30% dal numar di plantis, dal 40% de lôr masse, dal 70% dal numar di plantis in part secjis o cun busis.
◆ Il confront dai parametris rigjavâts intai doi periodis di studi al à dimostrât une semplificazion de composizion dal popolament di uciei intal secont periodi. In particolâr, e je stade verificade une diminuzion di plui dal 10% des speciis, di plui dal 15% de bondance e dal 20% des speciis no Passeriformis (che a son chês che a indichin une plui grande complessitât dal popolament). Ancje altris parametris, par esempli chei che a tocjin la diversitât dai uciei, a son risultâts plui bas intal secont periodi di studi.
Altris aspiets evidenziâts de indagjin a son:
• La diminuzion dal numar di speciis intal secont periodi al è dovût a chês leadis ai arbui, che no son stadis plui cjatadis.
• La diminuzion de bondance intal secont periodi e je peade no dome a chês parsore, no plui contatadis, ma ancje a un altri grup di speciis leadis ai arbui che a son stadis cjatadis in ducj doi i periodis, tant che i pics, ma une vore di mancul intal secont.
• Lis speciis cjatadis dome intal secont periodi no son leadis a strent cui arbui.
◆ Il studi al à dimostrât che l’impuariment de diversitât arbore urbane al pues vê consecuencis no trascurabilis sui popolaments di uciei, e in particolâr su lis speciis leadis ae presince di vecjos arbui cun ramaçs secs, busis, len muart. Duncje, ancje tai contescj urbans al è necessari che i intervents selvicolturâls a sedin planificâts e gjestîts di tecnics specializâts e che no sedin doprâts, cemût che dispès al capite ancje intal ambit public, tant che pretest par fâ deventâ plui puars o eliminâ i popolaments di arbui (par esempli, sostituint vecjis plantis e/o speciis autoctonis cun zovinis plantis di speciis aloctonis) ancje dopo de realizazion di oparis di vari gjenar.
◆ Par rivâ a vê risultâts concrets si à però di butâ jù lis crodincis ripuartadis al inizi e tignî in considerazion che lis plantis a son elements vivents e che ancje lis azions che si fasin intes areis urbanis a puedin incidi in maniere sostanziâl su la biodiversitât. Une prevision che, però, e podarès jessi cuasi risolutive intai câs leâts a intervents publics e je chê di fâ assumi la responsabilitât des azions fatis e des lôr consecuencis. Dispès, di fat, si interven su plantis di proprietât publiche cence il coordenament di tecnics specializâts, lant a incidi in maniere sostanziâl su la salût des plantis, cun problemis consecuents di caratar fitosanitari (che a puedin puartâ lis plantis ae muart) e duncje di stabilitât e di sigurece par ducj.
◆ Se si ten in considerazion dut ce che lis plantis nus dan intai ambients urbans miorant la cualitât di vite des personis (riduzion dal incuinament chimic e acustic, salubritât dal aiar, miôr cundizions climatichis, bielece dal “paisaç”, ombrene di Istât, pussibilitât di frecuentâ un contest plui preseabil di chel cun asfalt e peton, e dulà che, par esempli, al è plui salutâr fâ ativitât fisiche, e vie indevant), che i intervents a son justificâts ancje de “sigurece publiche” (cuant che dispès a diminuissin, cemût che o vin viodût parsore, e chest al ven fat doprant bêçs di ducj) e che il mantigniment di une cierte complessitât de vegjetazion al è fondamentâl ancje par chei altris vivents (che cu la lôr presince nus rindin plui plasevule la vite intes citâts), si rint propit necessarie une indreçade aes personis che a ocupin un puest inte publiche aministrazion e che si sintin in podê di previodi intervents che a son fûr des lôr capacitâts, intal contest di modificazions ambientâls, di riduzion de biodiversitât e di cambiament dal clime che o stin vivint.chi stin vivint, oltremût necesaria. ❚

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +