Sfuei Mensîl Furlan Indipendent
Archivi de Patrie

La multiculturalitât e valorize il grant e il piçul

Zuan Marc Sartôr

Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic sloven, che cualchi an plui indevant, insiemi cul so ancjetant famôs coleghe Ludwig Boltzmann al pandarà la leç rivoluzionarie sul iradiament di un cuarp neri. Intai stes agns, un cramâr transilvan al torzeone ca e là, fûr pal Ream di Ongjarie, cirint di spaçâ o al piês sgnacâ peçotis e tocs di lane otignude des fedis dai Monts Carpats. E ancjemò, un nodâr boem al è daûr a rivâ inte cueste cravuate dal Carnâr (Kvarner pai locâi), dulà che al passarà timp respirant aiar di mâr e mangjant bon pes. Ducj chescj personaçs intai lôr viaçs fûr des lôr tieris no cjatin nissune dogane o vuaite di frontiere, a pain dapardut cu la valude compagne e, a nivel sociâl, a puartin ator la lôr culture, miscliçant diviersis tradizions e ûs, che dut câs a vegnin rispietâts. Dificil sintî in Austrie Ongjarie une imposizion culturâl o linguistiche in ambient popolâr, stant che di nazionalitâts a ‘nd è un grum e cun di plui tant eterogjenis di no podê fâ sudivisions. Purpûr, daspò de Prime vuere mondiâl a forin ben fâts sù mûrs e stâts, clâr, cu no pocjis imprecisions. Ma intant che si scombateve, intal 1916 si ve il cambi di vuide. Il gnûf imperadôr Carl I al jere zovin e al saveve che in chei timps in mudament la autodeterminazion dai popui e jere un obietîf primari. Al fo par chest che al proponè un stampon di riforme dal imperi, un progjet par dâ vôs a dutis lis identitâts de dople monarchie. Clâr che al jere masse tart, ma la idee di confederazion e fo cjapade sù intal dopovuere di un altri (ex) austroongjarês, il cont Richard Nikolaus di Coudenhove-Kalergi (fi di un diplomatic austriac de dople monarchie e di une gjaponese dissendente di une antighe famee di samurai). Il moviment nassût al cjapà il non di Paneurope e in struc al è stât precursôr de Union Europeane. Tra i ponts principâi a jerin la union doganâl, une monede uniche e soredut la tutele di dutis lis diversitâts e identitâts culturâls (clamâlis cul tiermin “minorancis” no ur darès il valôr just). Nol è un câs che chest pinsîr al sedi stât formulât di personis che a fasevin part di un imperi multiculturâl. Al è propit preseant ogni diversitât e i siei efiets (la capacitât di misturâ elements e creâ inovazions) che si à capide la impuartance di une interconession plui grande. Cun chest si vûl sburtâ sul fat che al è falât meti in oposizion la culture locâl e chê di stât. Inte suaze dal Friûl, duncje, la culture scolastiche taliane e chê furlane, slave e gjermaniche, a àn rilevance e impuartance compagnis. Duncje, tabaiâ di discors come “sielzi” se insegnâ une o chê altre al è dibant. Cetancj personaçs famôs a àn vût gnuche propit parcè che a àn vivût in ambients diviers, podint doprâ misuris diferentis. Resonament che purtrop in dì di vuê al è mancul comun. Cu la sperance che une dì il plui de int si tornarà a inacuarzi di chest, al è juste il câs di visâsi dal sproc “al è miôr butâ jù un cjistiel che dismenteâ une usance”. ❚

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +