Sfuei Mensîl Furlan Indipendent
Archivi de Patrie

La manarie dal Covid sul agriturisim

Adriano Del Fabro – diretôr dal bimestrâl “SoleVerde”

Colade a dôs cifris des presincis,
ma e cres la atenzion pai cjasâi didatics e sociâi

Il Rapuart 2021 dal Ismea sul agriturisim al furnìs une fotografie puntuâl su lis consecuencis che la pandemie e à provocât su chest setôr tant impuartant e inovatîf de nestre economie agricule. O vevin scoltât il berli di dolôr dai operadôrs, dilunc dai luncs mês dal distanziament e des limitazions ai moviments, ma forsit no imagjinavin la puartade reâl che vuê e ven ae lûs.
◆ Intal 2020, i 702 agriturisims dal Friûl-VJ a àn fat regjistrâ 31.117 rivadis, cuntun sbassâsi di 31.956 sul an di prime (-46,3%, a front di une medie taliane dal -41,4%). Intal 2017, lis rivadis a jerin stadis 73.167.
◆ Lis presincis a son stadis 142.175, cuntun sbassament di 69.172 sul 2019 (-32,7% a front di une medie nazionâl dal -34,4%). I ospits, pal 67,1% a jerin talians e pal 32,9% forescj (inte medie taliane).
◆ In complès in Italie, l’agriturisim intal 2020 cun 2,2 milions di rivadis e 9,2 milions di presincis al à pierdût, a pet dal 2019, il 41,4% des rivadis (-1,5 milions di turiscj) e il 34,4% des presincis (-4,8 milions di gnots). La buine notizie e je che, dentri dal câl dramatic dal turisim causât de pandemie, l’agriturisim al è risultât tra lis ativitâts che plui a àn cressût la proprie cuote di marcjât su dut il setôr, passant dal 2,9% al 4% par numar di ospits e dal 3,2% al 4,4% par gnots, compliç il distanziament pussibil e lis permanencis e lis ativitâts tal aiar viert, in cundizions di sigurece assolude.
◆ I talians a àn, a ben che in maniere lizere, moderât il colp causât de cjadude de domande foreste che e à pesât pal 72% sul câl dai ospits e pal 96% sul câl des gnots. In consecuence di chest, lis rivadis talianis intal 2020 a àn rapresentât il 70% dal marcjât e, pe prime volte de metât dai agns doi mil, lis gnots dai talians a àn passât chês dai forescj lant dal 42% al 62% di chês totâls. Cun di plui, in cuintritindince a pet dai ultins agns, si regjistre un aument de permanence medie che e je tornade a passâ i 4 dîs.
◆ Cemût reagjî ae crisi? Cinc a son lis rispuestis ufiertis dal Ismea: plui tipicitât des produzions e de mangjative (l’ospit e il consumadôr a cirin prodots stagjonâi e identitaris); ufrî la pussibilitât di consegne a domicili e e-commerce; organizâ spazis furnîts pal smart working e lis permanencis par luncs periodis; plui sostignibilitât (imersion inte nature e intal contest rurâl in sigurece e autonomie) e diversificazion dai servizis ufierts. In chest ultin contest, il Friûl-VJ no si è fat cjatâ impreparât, soredut se o fevelìn di cjasâi didatics e sociâi che a son cressûts dal 16,8% intal ultin an: la plui grande incressite tra lis regjons, dopo de Val Di Aoste (cuintri une medie taliane dal 4,2%. 139 chês censidis in regjon intal 2021). Chestis realtâts, par altri, a dan lavôr a 54 operadôrs (cuintri i 70 des Marcjis e i 6 dal Abruç).
◆ L’interès dai consumadôrs viers chestis formis di ufierte turistiche al è fuart, acompagnade di une simpri plui grande disponibilitât a premiâ cui che si impegne par obietîfs cun ricjadudis positivis su la coletivitât e su lis personis (educazion ambientâl e alimentâr, inclusion, dirits, e v.i.) in plui che pai propris obietîfs aziendâi. ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +