Sfuei Mensîl Furlan Indipendent
Archivi de Patrie

La Lungje gnot des plêfs in Cjargne si vistìs di rose dai 15 ai 17 di Lui: une edizion dute al feminîl

Alessio Screm
Il côr ospit de Slovenie_Dekliški pevski zbor Glasbene šole Koper a La lungje gnot des plêfs in Cjargne

E je dedicade aes feminis di Cjargne la setime edizion di “La lunga notte delle pievi in Carnia”, la manifestazion curade dal Côr dal Friûl-Vignesie Julie, che e met insiemi coralitât internazionâl, lis bielecis des plêfs de Cjargne – spirituâls, architetonichis e paisagjistichis – e i produtôrs locâi, ufrint ai partecipants concierts cun côrs di grant nivel, la pâs des monts e buine robe di bevi e di mangjâ, dut intun contest rispietôs de sacralitât dai lûcs. Si davuelzarà di vinars ai 15 fin a domenie ai 17 di Lui (dutis lis informazions su corofvg.it), par un totâl di cinc apontaments, ducj declinâts in colôr di rose. A saran di fat cinc i côrs partecipants, ducj feminins, che a vegnin di Polonie, Austrie, Slovenie, e di Aurisine e Rome; cinc lis autoris invidadis a introdusi i concierts, contant storiis su liendis di feminis cjargnelis, e cinc lis produtoris gastronomichis cun bevandis e pitancis a chilometri zero.
◆ Un event che al vûl dâ merit ae impuartance che a àn vût e che a continuin a vê lis feminis, no dome in Cjargne, ma in ogni tiessût sociâl di ogni timp e bande dal mont. Al è dut câs su di lôr, lis cjargnelis, che si concentre cheste narazion corâl cetant seguide e sostignude dal festival musicâl Carniarmonie, che chest an al rive ae trentesime prime edizion, cun ben 43 concierts, scomençâts ai 25 di Jugn e che a laran indenant fin ai 10 di Setembar.
◆ La lungje gnot des plêfs, une manifestazion di trê dîs leade cul “Cammino delle pievi in Carnia”, tra pelegrinaç, turisim culturâl, corâl e enogastronomic, e cjape il vie inte plêf di Sante Marie di Castoie di Soclêf, vinars 15 aes 19.00, cul côr feminîl “ASBeek” che al ven de Polonie, cuntun program vari e la introduzion de autore Barbara Vuano che e à scrit il libri “Nascere nella cenere”, cun testemoneancis des ultimis ostetrichis condotis in Cjargne. Po dopo, tal prât de plêf, degustazions par cure di Sabrina Rovis, tra jerbis, decots e marmeladis.
◆ Sabide ai 16 di Lui al è in program un apontament dopli: aes 18.00 il conciert dal côr feminîl austriac “Frauenchor Vorderberg”, introdusût di pre Alessio Geretti, l’unic om tra lis autoris, che al contarà des feminis Santis, e finâl cul mangjâ di Mirena Morocutti tra paste frescje, dolçs e biscots de tradizion cjargnele. Aes 20.30 invezit, inte Plêf di Sant Stiefin, si esibìs il côr sloven, ancje chest feminîl, “Dekliški pevski zbor Glasbene šole Koper”, cu la introduzion afidade ae scritore Raffaella Cargnelutti dal titul “Le donne di Carnia nella storia”, che e passarà in rassegne in clâf emozionâl, dutis lis feminis che e à tratât in divierse maniere tai siei libris. Lis degustazions in chest câs a son curadis di Elena Sica, tra sirops, cremis e confeturis.
◆ Domenie ai 17 di Lui il finâl, cun altris doi apontaments. Inte plêf di Sante Marie di Guart a Davâr, al è ospit il “Coro femminile Dpz Igo Gruden” di Aurisine, introdusût di une prolusion de fotografe Ulderica Da Pozzo che e presente il so lavôr “Femines. Donne del latte”. Agnese Del Prato, ae fin dal conciert, e fasarà gustâ formadis e dut ce che il lat al regale. Finâl di rassegne inte plêf di Sant Pieri a Zui, aes 20.30, cul ensemble vocâl Oktoechos che al ven di Rome, cuntun program speciâl di musiche antighe, e une introduzion de scritore Melania Lunazzi che e contarà des sûrs tumiecinis Grassi: Angelina, Giacomina e Anna, scjaladoris aventurosis tra Vot e Nûfcent tra Cjargne e Cjadovri. Ae fin, Loretta Romanin e fasarà cerçâ jerbis aromatichis e tisanis. Dutis lis informazions e i inzornaments a son sul sît corofvg.it e su lis pagjinis social dal “Coro del Friuli Venezia Giulia”. ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +