Sfuei Mensîl Furlan Indipendent
Archivi de Patrie

Il Teatri Stabil Furlan al è pront par un Istât di circuitazion dai siei spetacui

Alessio Screm

“Rosada!” a Mittelfest, “La Cjase” e “Lis Pantianis” ator pal Friûl

Une stagjon teatrâl che e à inviât une scomesse, vinçude, l’an passât; une altre in cors di progjetazion; une schirie di colaborazions cun ents di culture furlane par diviersis iniziativis teatrâls par memoreâ personalitâts impuartantis de nestre storie, viôt Siro Angeli, Pier Paolo Pasolini, pre David Maria Turoldo, Luigi Candoni, un spetacul a misure di fruts par puartâ indenant azions concretis e ben slargjadis sul teritori pe promozion de art in marilenghe. E cumò si zonte une altre novitât, che si ingrandìs simpri di plui.
◆ Di fat, pal Teatri Stabil Furlan (Tsf), la produzion di spetacui di chest gjenar e a chest nivel e vûl dî cumò ancje sodisfâ la domande e puartâ indevant la propueste di circuitazion di chescj spetacui. Promovi, vendi lis oparis che fin cumò l’ent di produzion in marilenghe al à realizât, in graciis di coproduzions, comissions, sodalizis, acuardis virtuôs, sclets, che a funzionin benon. Ancje la presince in radio e in television – tant che par esempli lis metudis in onde di progjets par Telefriuli e pe Rai regjonâl – a son impuartantis a pro de culture dal spetacul par furlan.
◆ Oparis come “La Cjase. Lagrimis di aiar e soreli” e “Lis Pantianis e la machine dal timp” a stan zirant ator pal Friûl in diviers contescj, domandadis di tantis associazions culturâls, ents e festivals. “La Cjase” e je stade la prime produzion dal ent, pe regjie di Carlotta Del Bianco, in ricuart dal dramaturc cjargnel Siro Angeli (1913-1991), intant che “Lis pantianis” – altre produzion dal Tsf cun Michele Polo, Federico Scridel, Leo Virgili – al è un spetacul pensât pai plui piçui, ma ben gradît ancje dai grancj (la “prime” e je stade in ocasion de “Setemane de Culture Furlane” dal Mai passât). In sumis, un altri biel pas indevant.
◆ E inmò sore, une date cheste di segnâ in agjende, ai 25 di Lui, aes vot di sere, intal Convit Nazionâl “Paolo Diacono” di Cividât, par Mittelfest al larà in sene “Rosada!”, une produzion dal Tsf cu la partecipazion straordenarie dal musicist Paolo Fresu, trombetist di nomee internazionâl, sul palc insiemi cul atôr Nicola Ciaffoni e cu la cjantante Elsa Martin, tra musiche e poesie, tal non di Pasolini. Une idee dal coletîf Caraboa Teatro di Triest, cun dramaturgjie e regjie di Gioia Battista, cu la sorprese di un contribût speciâl di Bruno Pizzul. Un spetacul in prime esecuzion assolude, produsût dal Tsf insiemi cu la ARLeF. Un Pasolini inedit, une lenghe che si fâs musiche e che e torne a fevelânus un lengaç universâl. Prenotait il vuestri puest lant sul sît www.mittelfest.org
◆ Tornant ai spetacui che il Tsf al è daûr a puartâ ator pal Friûl vie pal Istât, al è interessant segnalâ che la opare “La Cjase. Lagrimis di aiar e soreli” e je stade di resint rapresentade in version “site specific”, ven a stâi “lûc specific”. O ben, ai 30 di Jugn intal Lassit Dal Dan in vie de Glesie a Bagnarie Arse, e la dì dopo, il prin di Lui, a Merêt di Tombe in Cjase Someda De Marco, la rapresentazion rivisitade di “La Casa” di Siro Angeli e je stade inseride intun ambient particolâr, dut furlan, no ricostruît di un pont di viste senografic come che si fâs apont di solit in teatri.
◆ Un progjet riessût, partecipât e realizât pal “Teatro nei Luoghi”, rassegne di spetacul teatrâl itinerant ideade e promovude di bande di “Prospettiva T – Associazione per la musica e la prosa / teatrino del Rifo”. Come che e à notât la regjiste Del Bianco, par une forme di teatri contemporani che si intint puartâ indenant: «L’event al è un viaç a tapis tra cjasis, corts, viis, glesiis, midiant di cualchidune des senis plui significativis de opare teatrâl. Un spetacul itinerant, fis di rimants poetics e di sugjestions par celebrâ il grant poete e dramaturc, fasint rivocâ lis sôs peraulis intal cûr di cualchidun dai borcs plui sugjestîfs de nestre tiere».
◆ Chê altre opare dal Tsf, a misure di frut, tra teatri e musiche, “Lis Pantianis e la machine dal timp” – che e je plasude tant ai picinins come ancje ai lôr gjenitôrs, t iriverente, scherçose, matarane, buine di svicinâ al furlan ancje cui che no lu pratiche masse – e à pal moment trê datis in program dilunc dal Istât: ai 23 di Lui a Premariâs, al 12 di Avost a Davâr e ai 21 di Avost a Jalmic. Dutis lis informazions e i inzornaments ju cjatais sul sît www.teatristabilfurlan.it. ❚Paolo Fresu al è l’ospit speciâl di Rosada! Une produzion dal Tsf par Mittelfest

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +