Diligite iustitiam. La vôs de Leç

Il prin pas par dineâ, la autonomie al fo proibî al popul
furlan di mantignî il so codiç juridic che si jere tramandât
di gjenerazion in gjenerazion
Ve chi ce che nus à gafât vie la çate dal Leon di Vignesie. E li, tu puedis lei dute la malizie e la tristerie de “Tristissima”, altri che “Serenissima”! Parcè che i savis de lagune a savevin une vore ben che par grêc, come che a spiegavin i professôrs “in utroque iure” de Universitât di Padue, leç si dîs “Nomos”. E chei che a scrivin la lôr leç par so cont, a fasin un at di “Autos Nomos”, e duncje di Autonomie. Il prin pas par dineâle, la autonomie, al è duncje proibî a un popul di vê un so codiç juridic. Al è come gjavâi la vôs de cussience, chê profonde e clare che ti comande di secui, parcè che e je la espression di chê tiere là che tu sês nassût.
◆ La produzion di normativis e di articui scrits par normâ la vite dai furlans e à lidrîs antighe in tiere patriarchine. Disìn che se i prins manuscrits e i esemplârs plui vecjos ju tachìn a vê intal secul XIV, chest nol vûl dî che prime no jere nissune norme stabilide par organizâ la vite des comunitâts. La int e saveve benon ce che si podeve fâ, ce che si scugnive fâ (duncje la distinzion jenfri dirit e dovê) e ancje cemût rivâ a organizâsi par fâ funzionâ pal miôr chel “pactum sociale”, ven a stâi chel contrat di oms libars che al manten vive la buine convivence, tignint il ben comun tant che principi fondamentâl e regoladôr des azions di ducj.
◆ Tachìn cul dî che in ogni vilaç de Patrie, fin de Ete romane barbariche (cuant che, prime i Gôts, e po dopo i Langobarts e i Slâfs, si son insediâts intal nestri teritori, duncje intun periodi che al va dal secul V al secul VI) a esistevin compuartaments virtuôs regolâts in forme consuetudinarie, o ben indreçade su la sapience dai vons e tramandade di gjenerazion in gjenerazion in forme pal plui orâl. In gjenar, si leve a definî il principi e la fin de stagjon agricule; si stabilive cuâi lens podê taiâ tal bosc e ancje la cuantitât juste, escludint cierts periodis dal an par judâ i arbui – risierve straordenarie di risorsis intune economie agricule, silvicule e pastorâl – a cressi sans e a mantignîsi fuarts; si limitavin i cjamps considerâts di ducj, lis comugnis, là che ognidun al podeve lâ a bruscjâ, a fâ fen o a puartâ il besteam al pascul cence jessi obleât a paiâ nuie a di nissun; si stabilive il timp de fieste e si lu divideve dai dîs di vore; si regolamentave il marcjât, identificant il lûc là che si podeve inmaneâlu e lis zornadis dal calendari libaris e convenientis. Si stabilive ancje la punizion che e veve di jessi dade a chei che si gjavavin fûr di cheste leç comunitarie e duncje, di escludûts, a vignivin “bandîts”, intal sens di “metûts in bande”, parâts fûr dal circuit de coletivitât. La tradizion, peade secul par secul, si faseve cjar e sanc, si inlidrisave tal paisaç che ducj a cognossevin, parcè che a jerin nassûts propit alì e salacor no si saressin mai slontanâts par dut il timp de lôr vite.
◆ Chestis costumancis a son stadis tant fuartis che nancje la organizazion imperiâl – prin chê di Carli il Grant (secul IX), e po dopo chê dai Otons (secul X) – e rivarà a dineâlis.
Cu la nassite dal Stât patriarcjâl, si fâs sintî simpri plui fuarte la necessitât di trascrivi dute cheste tradizion, considerade cetant siore di sapience e di bon sens. Ogni Comunitât e tache cussì a organizâsi par ratificâ la memorie de tradizion.
◆ A nassin i Statûts, che a podaressin ben jessi considerâts tant che la regjistrazion su la cjarte – atualizade aes gnovis necessitâts e ai timps cambiâts – di chê tradizion orâl che e valeve prime. A scomencin ducj cun “Diligite iustitiam”, vâl a dî “Amait la justizie”. Al è straordenari, par esempli, che par solit ogni articul al tache cu la racomandazion rituâl “Secundum antiquam consuetudinem”, o ben “In ubidience a la antighe tradizion”. Un ricognossiment cuasi sacrâl ai Paris e ae lôr creance. A jerin scrits par latin, la lenghe francje de autoritât.
◆ Ma ce che nus lasse simpri inmagâts, cuant che ju vierzìn, e je la atenzion e la premure profonde pe popolazion che il latin no lu capìs. Cussì, il legjislatôr si sfuarce di doprâ peraulis che a vegnin propit de lenghe furlane e po dopo a son voltadis par latin, intun sens di rispiet de culture di sostrât. Cussì, la curtisse e devente guartizza, il riviel rivellum, il cjastinâr castenarius, il sassin sassinus, la vuarzine varzina.
O podaressin lâ indevant.
◆ Une ultime note: la atenzion risiervade aes categoriis plui debilis, tant che lis feminis, lis veduis, i fruts e i forescj e je grandonone. Segnâl di un Auton Nomos a favôr dal Popul. E no di un imprest dal potent par profitâsi di lui. ❚