Sfuei Mensîl Furlan Indipendent
Archivi de Patrie

CE SUCEDEVIAL IN CHÊ VOLTE TAL MONT? Biel tornant de Ongjarie

Agnul Floramo

Il strent leam cu la tiere danubiane

Une storie complicade ma plene di interès, chê de Ongjarie intal periodi che al cjape dentri la fin dal secul XIV e i prins vincj agns dal ‘400. Intant, bisugne tacâ cul dî che la storie de nestre Patrie e je simpri stade instreçade in maniere straordenarie cun chê ongjarese. La diocesi di Aquilee, come che o savìn ben, fin dal at de sô fondazion in ete costantiniane, e rivave a poiâ i pîts su lis rivieris dal Balaton. La Historia Langobardorum di Pauli nus conte che Lopchis, il so antenât, al vignive propit di un vilaç de Panonie. E par secui, la grande strade che e leve daûr dal cors de Drau e de Save finint inte Danau, e jere pestade di marcjadants che a tignivin insiemi lis citâts di Buda e di Pest dongje di chês di Cividât e di Udin: monedis, pinsîrs, art e bielece a univin duncje il Friûl e il ream dai Ongjarês.
◆ Ma nol baste: cuant che intal 1382 il vecjo re Luîs I al mûr, la corone e passe, dopo un moment di tension fuarte, al om di sô fie Marie, ven a stâi a Sigjismont di Lussemburc, fi di un dai plui grancj imperadôrs de Ete di Mieç e amì straordenari de Patrie dal Friûl, ven a stâi Carli IV. Une famee, chê di Lussemburc, che e veve dât al Patriarcjât ancje il grant Nicolau, barbe di Sigjismont e svindicadôr dal sassinament dal Patriarcje Bertrant. Un tron une vore bulint, chel di Sigjismont, dal moment che il re al veve di tignî di voli i Turcs, la oposizion interne dal fuart partît di oposizion, peât ae famee dai Angiò, e ancje il re cravuat Hrvoje Vukcˇi´c  Hrvatini´c     che al dominave su Dalmazie e Slavonie e, poiât dal so vescul Paul Horvat, al voleve smarcjâsi simpri di plui dal control de corone ongjarese. Cuant che l’opistor (vescul) angjioin di Sigjismont, Ladislau di Napoli, al à vendût a Vignesie i siei dirits di sucession su dute la cueste Dalmate, la Serenissime si fasarà une des nemiis plui invelegnadis dai Ongjarês e massime dal lôr re. Par chest, Sigjismont al sarà il plui fuart aleât dal patriarcje Ludwig von Teck, l’ultin princip in temporalibus, intes azions di difese de Patrie jenfri il 1419 e il 1420. Par fâ cuintri ai tancj nemîs, la inteligjence di Sigjismont e sarà chê di dâi fuarce soredut aes citâts e ae borghesie, di simpri contrarie ae nobiltât. Nomenât re dai Romans intal 1410 e duncje costret a spostâsi in continuazion jenfri lis capitâls di chel grant ream, al veve cjatât in cheste formule une aleance cetant potente tra corone e marcjât, che e permetarà aes comunitâts di invistî une vore in art e in bielece, sponsorizadis des bancjis e dai marcjâts.
◆ Crodint inte necessitât di union de Glesie ocidentâl, spacade dal Schisme, al sarà lui a sburtâ il Concili di Costance (1414-18), là che si poiarà la semence dal Umanisim. Al veve istituît un ordin militâr une vore potent e fuart, l’Ordin dal Dragon, par protezi la Cristianitât cuintri dai siei nemîs. In cualchi an, il voivoda de Transilvanie, che in chel moment e jere sot de Ongjarie, Vlad Tepes, al deventarà un famôs rapresentant di chel stes Ordin dal Drâc, e al sarà cognossût miôr tant che Dracula. Us disial alc? ❚

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +