Lis buinis gnovis no mancjaressin: il virus al somee dânus une tregue, simpri che la int no sedi masse strunele; la Union Europeane e je daûr a cuvierzinus di cussì tancj bêçs che no ‘ndi vìn mai viodûts; parfin il president de Regjon Fedriga al à decidût di no reglâ plui a Rome i contribûts che Tondo e la Serracchiani (e ancje lui par un an) a àn mandât jù dibant a Rome strassone.
◆ In cheste situazion di grande incertece o varessin di jessi contents di vê risorsis che a puedin judâ la economie e la societât di chenti a tornâ a partî. Ma ce fa di lôr, se no si rive a cjalâ lontan, a vê une voglade lungje, a capî in ce direzion che o volìn movisi tal avigni? Ce troi larino a percori di cumò indevant? Chel stes troi di sudizion che al à puartât il Friûl a pierdi in dîs agns plui dal 10 par cent dal so redit economic? Il troi di sotanance che 600 agns dopo la colade de Patrie (juste ai 7 di Jugn dal 1420) nus mene a ripeti i stes erôrs di chê volte e a regalâ al Venit tocs simpri plui pençs de economie, des infrastruturis, des risorsis de nestre tiere intune sorte di gnove riconcuiste?
◆ La domande e nàs di bessole, cjalant aes ultimis nominis che a àn regalât al Venit la vuide di Autovie (aministradore dai provents de tierce corsie fate su dome cui bêçs dai furlans, plui di 2 miliarts di euros). President al è Maurizio Paniz di Belun: vice, Tiziano Bembo di Mestre. E cumò lis Autoviis a son pardabon venetis: di non e di fat. Ai furlans ur tocje fâ che che a àn za imparât a fâ ben par 377 agns sot Vignesie: paiâ e tasê. Graziis pe clarece, ma o varessin fat di mancul dal replay. Ancje parcè che chest al è un VAR par ledrôs, nol ripare i tuarts ma ju moltipliche.
◆ Se chest al sucêt, e je prin di dut colpe nestre. Par savê dulà che o vin voie di lâ o varessin di cjalâsi ben tal spieli e capî cui che o sin e ce che o sin deventâts … Lu capive ancjemò tal 1989, cuant che il Mûr di Berlin al jere daûr a colâ, Pre Toni Beline che al domandave ai sorestants furlans “clarece di impostazion e coragjo tes sieltis”, ma nol somee che intai ultims trente agns e sedi vignude fûr la fuarce di une idee che e rive di bessole a sburtâ la vite di une comunitât. Il benstâ economic che nus à passûts al à platât la pierdite di une cussience identitarie che ae fieste di Sant Ramacul dal 1976 pre Checo Placerean al podeve ancjemò stiçâ, disint che «La plee de ricostruzion o vin di dâle nô e dome nô, sbaliant nô e dome nô, induvinantle nô e dome nô, parcè che se no o assistìn al ultin at de colonizazion che e dure dal 1420″.
◆ Vuê nol è plui nissun Pre Checo a indreçanus, ma al coventares domandâsi clâr: ce plee volino dâ ae ricostruzion dopo dal Covid-19? La nestre Patrie, cussì, biele e pierdude, ise in stât in cualchi maniere di risurî? O vino di fâsi di gnûf puartâ vie dut di Vignesie o di cualchidun altri? Trops sono i furlans che si ricognossaressin in chel “nô” che al fasè trimâ cetantis cussiencis?
◆ In spiete di rispuindi a chestis domandis, une biele gnove e ven de istruzion. Un impuartant editôr talian al à sielt par une sô antologjie di scuele su la puisie di meti dongje intun percors speciâl trê grancj poetis: Leopardi, Montale e Pierluigi Cappello. Cuisà che ancje pal mont de scuele, par tant timp pe plui part antifurlan, no sedi vignude la ore di inacuarzisi “di vei na storia, un passat, na tradision!” come che al diseve Pasolini. Par ripiâ fuarce e atrezâsi pal avignì ducj i sants a judin, ma a coventin ancje i poetis… ❚