La autostrade de sluvriade

A disin di fâ une gnove autostrade, di Glemone a Cimpel. Cemût no jessi contents? Cussì lis trutis dal Nunciel a rivin frescjis a Glemone, e lis trutis dal Orvenc a rivin frescjis a Pordenon.
◆ E i purliliês magnamadone, si lu sa, no mangjin nome madonis, ma a van mats pal lidric; pa la cuâl, i glemonats a àn benzà tacât une produzion industriâl di lidric tipic di Glemone, dut sta a viodi se lu clamaran il lidric Gabodul o il lidric dal Cuarnan. Però fat come cu va, cun ducj i stemis e ducj i acronims che in dì di vuê a coventin: DOC, DOP, IGT, IGP, STG, PAT, PDM, IBM, DJ, ANA, NASDAQ e v.i. Il camion navisele, cjamât di raìcio, in mancul di un cuart di ore al rive tal parc de vile Correr Dolfin par contentâ dutis lis feminis di Rorai Piçul e des vilis dulintor: autostrade al vûl dî “just-in-time-delivery” che vuê, nancje di dîlu, une societât evolude no pues fâ di mancul dal “just-in-time-delivery”.
◆ Chei di Cordenons, simpri pronts a nulî l’aiar des palanchis, a slargjaran i lôr arlevaments di folps che ducj in Friûl cognòs e presein. Cu la autostrade, i folps ti rivin in place dal Fier intun marimoment par contentâ ducj i gourmets di Glemone, e ancje chei di Plovie.
◆ Une valadrive di berbars dal Atlant marochin, cui lôr trops di cjavris e ce cu baste di becs e i lôr fedârs, no viodin la ore di logâsi sot dal gnûf puint sul Tiliment. A fasaran il formadi “Cjavrin dal Puint” che, benzà lu disin i economiscj, al sarà une “ecelence dal teritori” sfulminade intun marimoment a Davian e a Pinçan.
◆ Glemone e à un turisim flap a dî pôc, ma volêso meti cumò che a rivaran a turbis chei di Pordenon par un selfie sot dal Sant Cristoful e une “ombra” di Tocai te ostarie in face par bagnâ la peraule prime di gustâ, cussì, tic e tac, su pai stecs, timp che si scjaldi la mignestre o che e boli la aghe de paste.
Osovans e trasagans, chel compagn, jù ducj a Pordenon par un selfie sul puint di Adam e Eve, e un tai sot San Marc. Tornant indaûr, si fermin a Cordenons par jemplâ zeis e seglots di folps frescs, plui frescs di chei di place dal Fier a Glemone, e cussì ancje a sparagnin, e po sù di corse intun marilamp sot dal Fuart e dal Brancot.
◆ Si che duncje, ven a stâi, ducj contents. Le clamaran la autostrade de felicitât, dal biel stâ e dal magari ancje, la autostrade de biadelore e de badefate, la autostrade di ogni ben par chest an e chest an cu ven. Une sluvriade mai viodude compagne.
◆ E il vin di Cjasarse nol fasarà plui vignî la cjoche vaiote, ma une ridarole di chês!  ❚