Sfuei Mensîl Furlan Indipendent
Archivi de Patrie

INTERVISTE. David Puente, il cjaçadôr di ‘fake news’: «Fâur cuintri al è un dovê civîl»

............

David Alejandro Puente Anzil
David Alejandro Puente Anzil

Simpri plui cognossût par dute Italie, al à contribuît a smascarâ tantis “bufulis” vignudis fûr in rêt
Di Dree Venier
David Puente, 36 agns, al è peruan di pari, furlan di mari, venezuelan di nassite e al è a stâ in Friûl di cuant che al veve 7 agns. David al è un debunker: si clamin cussì chei che si impegnin par scuvierzi se a son veris ciertis notiziis che a zirin par Internet (e no dome). Une passion, chê de rêt e de informazion, nassude di zovin e che lu à puartât – fra chês altris sôs esperiencis – ancje a lâ a vore cu la Casaleggio Associati, la dite dal “guru” di Internet che al à fat sù il Movimento Cinque Stelle cun Beppe Grillo. Cumò al è simpri plui cognossût in dute Italie, parcè che al à contribuît a smascarâ tantis “bufulis” vignudis fûr in rêt intai ultins timps. Stant che al è a vore a Udin, no mi soi pierdût la ocasion di incuintrâlu par fâ cuatri cjacaris cun lui su fake news e informazion.
__
Ce fasial un “David Puente” a Udin, dal sigûr nol è un cognon locâl…

«Il gno cognon complet al sarès David Alejandro Puente Anzil. Mê mari e je furlane, di fat, e gno pari peruan. Si son cognossûts in Venezuela, parcè che la famee di mê mari si jere trasferide li e jo o soi nassût li. Ae etât di 7 agns si sin trasferîts a Tarcint: gno pari al à volût lassâ il Venezuela, parcè che al pensave che la situazion si sarès fate grivie. In chê volte lu àn cjapât par mat, un insegnant universitari che pal nestri futûr al è deventât operari, ma il timp i à dât reson».
__
Duncje lis scuelis tu lis âs fatis in Friûl… E cemût âstu rivât a diventâ espert di fake news?
«Sì, lis scuelis lis ai fatis ca, ancje la Universitât dal Friûl dulà che mi soi laureât in Siencis e Tecnologjiis multimediâls. Dilunc dai studis o fasevi un blog là che o frontavi temis tecnics, e o ai scomençât a interessâmi di notiziis e di “bufulis”. E cussì la societât Casaleggio e à notât chel che o fasevi e mi à clamât a lavorâ a Milan».
__
Se o pues fâ une critiche, nol è il massim intal curriculum di un debunker: o pensi ae colone “Tzè Tzè” dal blog di Grillo, li che al jere di dut…
«Chel progjet al jere nassût in altri mût e al è cambiât dopo vê dât lis mês dimissions. Purpûr mi interessavi di variis robis, e fra chês la verifiche dai contignûts. Cualchi volte i miei rilêfs a vignivin acetâts, cualchi volte no».
__
Cemût mai âstu lassât chel lavôr e sêstu tornât a Udin?
«O ai lavorât in maniere penze par agns cence recuie, no vevi une vite sociâl e Milan mi veve fat deventâ trist. A un ciert pont mi soi dit “vonde cussì!”».
__
E cumò, ce fâstu?
«O ai vierzude la partide Iva, o ai colaborât par diviersis realtâts, furlanis e no. O ai comessis impuartantis tal cjamp web e o gjestìs i rapuarts cui marcjâts spagnûi pai miei clients plui impuartants».
__
Duncje la ativitât dal to blog no tu le fasis par lavôr.
«Sigûr di no, e je une passion e le calcoli ancje un impegn civîl. Lu fâs la sere cuant che o torni a cjase. O soi restât un grant lavoradôr, i miei clients cuasi mi imponin di lâ in feriis (al rît, ndr). Ogni tant o scrîf par cualchi testade e cuntune di chestis o stin zirant un documentari educatîf».
__
Parcè nassino lis notiziis falsis, e parcè sono deventadis un probleme cussì grues?
«Domandonis… a esistin di simpri, visìnsi la frase des brioche assegnade in maniere falade a Marie Antonietta. A ducj ur plasin lis storiis: plui a fasin plasê, o dispresi, e plui a vegnin sparniçadis. Il lôr pont di fuarce al è la emozion che a discjadenin: tra chestis la rabie e je chê plui pericolose, parcè che e pues fâ nassi violence. Cui che lis cree lu fâs o par divertiment, par coionâ cui che i crôt, o in malefede disfrutant i sintiments di chei altris».
__
Mi somee che intal mont dai mieçs di comunicazion no sedi une grande culture dal debunking e dal fact checking. No son rubrichis sul argoment o redatôrs dedicâts a chest. Ce pensistu tu?
«La rêt, Internet, e à cambiât il mût di comunicâ. Prime o sielzevin e o compravin un gjornâl in edicule, vuê o podìn lei la notizie che o volìn midiant dal celulâr. In edicule a rivin dutis intal stes moment, in rêt cui che al rive prime al pues “vinci”. La presse e je un brut conseîr, lis redazions no controlin parcè che a son in ostaç dal timp. A falin ancje i miôr, ma intant il dam al è fat. La opare di debunking e je intrigose. A varessin di fermâsi, cambiâ metodi di lavôr e fâ sù un grup di fact checking stabil par ogni redazion».
__
Nol è dome Internet. Mi visi cualchi timp indaûr de fake news che e jere zirade su WhatsApp di un alarme teroristic intai centris comerciâi dal Nordest.
«O jeri propit intun centri comerciâl fûr Udin chê dì che al è stât sparniçât un audio li che si diseve che un responsabil de Polizie di Padue al saveve di atacs pussibii. Un amì mal veve passât e o soi stât il prin a zirâlu ae Polizie di Padue che e à contradit in maniere categoriche la “notizie”. La robe impressionante e je che no vevi mai viodût chel centri comerciâl cussì vueit di sabide. E chest nus dîs trop che une fake news e pues influî su lis nestris vitis, ancje dal pont di viste economic».
__
Nus contistu di un altri esempli di fake news locâl?
«Il Gazzettino di Udin, ai 2 di Jugn dal 2015, al veve publicât un articul dal titul “Scuâl martiel cjatât su la splaze inte lagune: salvât dai pescjadôrs”. La “prove” e jere une foto, ma fasint une semplice ricercje par imagjins o vevi scuviert che chê foto e jere stade fate a Sainte-Anne, in Guadalupa (Caraibis). Cumò, imagjinaitsi ce che a podaressin pensâ i turiscj: cualchidun spaurît di cjatâsi un scuâl in aghe al podarès decidi di anulâ il viaç».
__
Tai articui tu âs un stîl misurât e precîs, analitic. Mi fâs vignî iniment i tocs di Paolo Attivissimo, dean dai debunker in lenghe taliane (cumò resident in Svuizare e colaboradôr de Radio elvetiche).
«Paolo al è un grant gjornalist che o stimi, e che cumò o cognòs ancje in maniere personâl, ma nol è che mi sedi ispirât a lui e o vin doi stîi diviers. Ducj i doi o sin cordiâi, educâts, par no lâ jù al nivel inteletuâl di cui che al vûl imponi lis sôs ideis cu la insolence e il bulisim. Intai miei articui o ripuarti dut par che no si puedin tacâ, no lassi nuie al câs. E cussì, inte ricercje maniacâl di provis, o scuvierç che une presumude “bufule” e podarès jessi vere, invezit. Al sucêt ancje chest».
__
Aromai tu sês un espert, ti capitial che ti domandin consulencis?
«Si, mi capite dispès, e ancje dal forest. Di resint o soi daûr a colaborâ cuntun gjornâl francês intal cirî la origjin di cualchi “bufule”. Cu lis fuarcis dal ordin la mê disponibilitât e je massime e o furnìs ogni detai des mês ricercjis cuant che mes domandin. Intal 2015 o ai consegnât ai agjents, daûr de lôr domande, une mê ricercje su la “vite digjitâl” di un bandît leât a un procès a Rome. E je bastade une ricercje lungje e paziente in linie, fate cui imprescj juscj e dal dut legâi».
__
Par finî, nus dâstu cualchi consei par evitâ di deventâ vitimis, o piês difusôrs, di notiziis falsis?

«Stait atents ai titui sensazionalistics, no stait a fâsi tirâ a ciment des emozions, o leieit dut e doprait riferiments di plui bandis. Ognidun al pues colâ intune “bufule”: no stait a coionâ cui che i crôt, e tornait a dialogâ ancje offline devant di un cafè o di une sgnape (se o vês miôr chê, ma no masse). E no stait a fâsi sorevinci dai bravaçs in rêt, mantignîsi coragjôs e educâts. Se us ofindin o adiriture us menacin di muart – ogni tant a mi mi capite -, no stait a patî e denunziait». ❚
Dree Venier

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +