(L)INT FURLANE. La strategjie dal ragn

✽✽ I nemîs de autonomie no son stupits e a movin lis lôr pedinis su scachieris diviersis. In chest moment particolâr de vite politiche taliane a aprofitin de situazion, fasint cressi la pression su doi aspiets: chel culturâl e chel istituzionâl.
✽✽ Intal prin câs si amplifichin in ogni ocasion lis manifestazions di italianitât. Il svolt salvinian al jude no pôc, midiant dal abandon di ogni ipotesi federaliste e cul assorbiment, la identificazion totâl in cualsisedi rivoc nazionalist. Al bastarès il sproc eletorâl “Prima gli italiani” a sclarî lis posizions di cumò de Leghe; ma, sot sot, il pericul incombent pal popul furlan al rive dal meti in bande, e dispès cun dispresi ancje volgâr e violent, ogni diversitât: vuê il forest, doman cui che al fevele une lenghe minoritarie, cui che al difint une storie e une tradizion che no coincidin cui canui de love romane e dai siei cjantôrs. ✽✽ Che i fassiscj di Casa Pound a decidin di celebrâ a Triest, cuntune manifestazion nazionâl, il centenari de “vitorie de Italie inte Grande Vuere” al sune tant che provocazion bande la nestre storie, la nestre int. La tragjedie e devente comedie e e impon sui nestris cjâfs la sô cjame di muart e di nostalgjiis reazionariis. E pâr che e vueli dînus: «Si freìn di voaltris, dai vuestris corots e des distruzions, des miseriis che o vês patît parcè che…Vive la Italie! Patriotarde, savoiarde, republichine e republicane, di diestre e di çampe, ma simpri Italie. E voaltris no sês nuie».
✽✽ In tiermins mancul belicôs, ma no mancul sordins e pericolôs, si movisi sul plan istituzionâl. O crôt che tancj a vedin notât cemût che di cualchi mês, i assessôrs regjonâi di cumò no pierdin ocasion par declarâ che lis riformis a puedin jessi puartadis indenant dome in colaborazion cul Venit. La triestine Rosolen si sburte fin in Lombardie par domandâ la autonomie scolastiche, come se la nestre specialitât bessole no bastàs a rivâ a un risultât. Plui sclete la assessore ae Culture che cence nissune vergogne e anunzie l'”An Leonardian”, che dutis lis struturis periferichis a varan di sotstâ a chel intai lôr programs.
✽✽ Ae ponte plui alte di cheste logjiche “al ribàs, fin al anulament”, al rive Riccardi che, tra lis riis, al sugjerìs di tornâ sot de ale protetore dal guvier centrâl par ce che al tocje la sanitât: chel model di autonomie che dute Europe nus invidiave al è lât a tocs par colpe di cui che al à guviernât intai ultins decenis, e cumò si dâi ae autonomie la responsabilitât.
✽✽ Cemût vino olsât a programâ lis nestris vitis difûr dal centralisim roman, ce pensavino di otignî rivendicant lis nestris capacitâts di vore, professionâls e di onestât? Volevino forsit l’autoguvier?
✽✽ Iludûts, al pâr che a vuelin dînus, o sês stâts e o restarês dome che i “Ultins”, pronts par jessi imolâts sui altârs de lôr Patrie, chê che i plâs a Salvini e, se al tornàs al guvier, ancje al Pd.
La marcje di Casa Pound e je dome che l’aperitîf. ❚
Dree Valcic