Al è mancjât Otto D’Angelo, il pitôr de civiltât contadine

In passe mil cuadris, al à rapresentât e celebrât il so amât Friûl, chel di une volte
Otto D’Angelo, il pitôr de civiltât contadine si è studât ai 8 di Setembar, a 95 agns. In passe mil cuadris, D’Angelo al à rapresentât e celebrât il so Friûl, chel di une volte, cuntune delicatece e une sensibilitât che lu vevin fat jentrâ a bon dirit tra i artiscj plui amâts inte Patrie e tra chei che dal Friûl a vivin lontans, ma che di cheste tiere a puartin intal cjâf e intal cûr lis imagjins.
Ultin di vot fradis – ve il parcè di chel non -, D’Angelo al jere nassût a S. Vît di Feagne ai 28 di Lui dal 1923 intune famee di metadiariis, e al steve a Cjaurià di Colorêt di Montalban. Cundut de etât, nol veve mai molât di piturâ. Prin fumetist, al à passât un periodi in France dulà che al à tacade la ativitât di dissegnadôr di fotoromançs, cetant content pe cariere tacade, ma cul desideri di tornâ a cjase, intal so amât Friûl. Otto al decidè cussì di tornâ in Patrie e di documentâ, midiant de sô art, tradizions e usancis, borcs e placis. Lis sôs pituris, poesiis di amôr pal Friûl, a son in dut il mont: nol è un Fogolâr che nol vedi une sô opare.
D’Angelo al à colaborât ancje cu La Patrie dal Friûl. «Intal  2012 o vin decidût che o varessin domandât a Otto di ilustrâ lis cuviertinis de Patrie cui siei dissens – al ricuarde Dree Valcic, in chê volte diretôr dal mensîl -. O vevi viodût publicadis tantis fotos des sôs oparis e o jeri restât inmagât pe fuarce e pe vivarositât che a trasmetevin, ma viodimes esponudis inte realtât dal so studi, e je stade une rivelazion. Tant che dal rest e fo une vere maravee tornâ a vivi la sô vite di pitôr, ilustradôr, fumetist midiant dal zîr che nus à fat fâ a mi e a Christian Romanini in chês stanziis. Al veve aderît daurman ae nestre richieste e ogni mês in maniere puntuâl al rivave il so dissen che al deve lustri al articul, al argoment plui impuartant de riviste». ❚
par cure de redazion