INCHIESTE: SCUELE. Plui autonomie pe scuele furlane. La Regjon e cjale a Venit e Lombardie… parcè?

Se dal centralisim roman si passe a chel lombart venit, no fasìn un grant afâr!
E je tacade scuele, ma par tancj fruts la situazion no je ancjemò definide. La situazion furlane e je pardabon dificile no dome pes mancjancis intai organics, ma par une gjenerâl confusion inte organizazion. Nol è di maraveâsi. Ancje l’Ufici scolastic regjonâl – che, al è ben visâsi, al è stât declassât e cumò al dipent di chel dal Venit – al è sot organic. E cussì, no je nissune maravee che a sedin cetantis classis che a un mês dal inizi de scuele no àn ancjemò ni l’orari complet, ni la scuele cun avonde mestris, professôrs o bidei. No stin a fevelâ dai insegnants di sostegn, che a coventaressin tant che l’aiar, ma no si cjatin fûr in nissune maniere. Ma il pont plui critic a son i 100 istitûts su 172 in cheste regjon che a son cence dirigjent: e 50 a son ancje cence diretôr dai servizis aministratîfs, ven a stâi cuntune segretarie che e funzione a miezis. Lassìn pierdi la situazion edilizie: lis struturis dulà che i nestris zovins a stan ogni dì no son simpri a prove di sigurece.
Ma la assessore ae Istruzion de Regjon Alessia Rosolen, poiade dal president Massimiliano Fedriga, e à la soluzion. E fevele de necessitât di resonâ su la gjestion in forme autonome dal sisteme de scuele e de formazion. Ma no cu lis fondis che fin cumò a jerin stadis metudis di chei (par esempli, Bruno Forte, za diretôr dal Ufici scolastic regjonâl dal Friûl-Vignesie Julie) che a vevin frontade la cuistion prime di jê: cumò la gnove referente ae Istruzion e ponte il dêt su la prioritât di metilis in conession cu lis rivendicazions di autonomie di Venit e Lombardie, che a àn daûr la fuarce di referendums popolârs par domandâ gnovis competencis.
Dut ben, se nol fos cualchi pont di sclarî. A part la sotanance politiche di une Regjon che no je buine di difindisi di bessole e par rivendicâ la sô autonomie e scuen peâsi a altris che a son stimadis plui fuartis e dominantis, al ven di domandâsi: cuâl saraial il model di scuele che o domandarìn di gjestî in autonomie? Saraial un model adat aes dibisugnis di cheste Regjon o il model sovran che o larìn a negoziâ cul Stât saraial chel venit e lombart di slargjâ ancje al Friûl-Vignesie Julie? Dutis chestis Regjons a son guviernadis de Leghe che une volte e jere federaliste, ma cumò e podarès jessi tentade de semplificazion di un model politic che al tente di leâ dut il Nord de Italie intune Macroregjon di fat.
In chest câs, bisugnarès sclarî ce che e jentre la nestre scuele cui modei venits e lombarts. Modei che a son dal dut diferents dal nestri. La rispueste e je: nuie. Ce i covential ae scuele furlane? Plui atenzion aes scuelis piçulis e “multi ples” e al dimensionament des rêts, plui atenzion aes lenghis minorizadis, ae autonomie dal Ufici scolastic regjonâl sedi in clâf organizative che didatiche. Dutis robis che al “model lombart”, citât dispès tant che esempli dal gnûf Ministri ae Publiche istruzion Marco Bussetti, no i coventin: parcè che alì lis scuelis a son grandis e la maiorance e je logade in areis urbanizadis. Se a àn problemis cu lis lenghis, nol è cu lis minorancis linguistichis (di fat, no ’nd àn), ma cun chês de gnove migrazion. Pe scuele lombarde il probleme plui penç al è incentivâ la alternance cul mont dal lavôr, e lis risorsis a son orientadis su chel. Il fuart sproc pratic e la presince dai students in fabriche e dai esponents des categoriis in aule e je une costante. Pai istitûts tecnics talians la leç e fevele di 400 oris di alternance, ma chei lombarts a ’nt fasin il dopli. Di norme a son 800, ma cualchi scuele e rive fintremai a 2000. La importazion di chest model in Friûl e je pardabon impussibile. No son avonde aziendis di fat par ospitâ ducj chei students: e chês che a son, a àn cif e çaf a rindisi disponibilis par ducj i fantats che ur vegnin mandâts des scuelis. Intal Venit, il model al è simil a chel lombart, cuntune acentuazion de atenzion pes scuelis paritariis. Nuie ce dî, ma a son realtâts diferentis de nestre. E se dal centralisim roman o vin di passâ a chel lombart venit… forsit no fasìn un grant afâr! ❚
di Walter Tomada