Sfuei Mensîl Furlan Indipendent
Archivi de Patrie

La Cjargne viodude di Mario Gollino

Marta Vezzi
Mario Gollino

Mario Gollino, fintremai cualchi mês fa President di Carnia Industrial Park (ex Cosint), za a cjâf de delegazion dai industriâi dal Friûl de Alte (e no dome), nol à mai lassât di cjalâ bande il doman de nestre tiere di Cjargne. «Il Consorzi – al dîs – al met dongje lis aziendis industriâls che si cjatin tai comuns di Damâr, Tumieç e Vile. Al à il compit di favorî chês altris aziendis che a vegnin a insediâsi li, e chês che za a son insediadis si cjatin tant ben che si espandin. Cuant che o soi rivât jo al à vût un cambiament radicâl parcè che prime al jere un ent public e vonde: po al è deventât un ent public economic, ven a stâi che al veve di movisi cui siei pîts e cu lis sôs financis. E al è lât ben che jo o sedi rivât in chel moment, parcè che gjestî un ambient public e lis sôs financis al è ben diferent dal gjestî lis financis di un ambient privât. Tal ambient public ti dan un contribût par fâ une opare; tu – tirâts i bêçs – tu fâs la opare cui stâts di avanzament e vie. Il privât al à di viodi se i conven fâ la opare, ce maniere che si à di fâle, trop che e rint, trop timp che tu âs par rientrâ dai invistiments e v.i.. O pensi che o vedin fat un bon lavôr, tacant dal vê comprât l’ex magazen de Coopca, che al è stât il prin acuist dal Cosint cence finanziaments publics. Dopo, o vin svilupade une politiche di incentivazions e o vin cirût di dâ aes aziendis dute cheste esperience: ce che lôr a van a cirî par podê cjatâsi miôr a lavorâ in Cjargne. O pensi che o sini rivâts! A vuê a restin dome doi puescj libars te zone industriâl di Damâr: a Tumieç al è dut plen. A Damâr a nassaran dôs aziendis: une che e lavorarà il len e une che e fasarà materiâi odontotecnics, cuntune buine ocupazion. No son altris spazis ma e je tante int a lavorâ, parcè che fra chei che a son tal Consorzi e chei che a son a pene fûr ma che a gravitin ator ator dal Consorzi a son plui di 5 mil dipendents… che pe Cjargne no son pôcs! Plui di mil a vegnin ogni dì a lavorâ in Cjargne di altris bandis dal Friûl. Il Consorzi al à di mantignî i puescj di vore e magari ancje fâju cressi par infuartî chei che a son. Nô cjargnei no din di plui di chei altris, ma o din sot!»
◆ Cuant che a Mario si domandi cemût che al viôt la Cjargne di vuê e di doman, al rispuint cun grinte «Simpri in positîf! Se o cjalìn la Cjargne di vuê, o dîs che o varessin di lamentâsi un pôc di mancul, parcè che cualchi volte no vin motîfs par fâlu! Si sta miôr achì che no di altris bandis! Il Covid nus da une grande briscule: no je mai stade tante int come chest an, ca di nô. Jo o pensi che e vignarà ancje di Invier ma mi interesse soredut l’insiemi Invier e Istât: o podìn ufrî une alternative valide a la int che e leve al mâr o in crosere, e che no larà plui par agns e agns… O crôt che o vedin di jessi pronts a ricevi cheste int. No ‘nt covente tropis: al è puest, a son agriturisims e ancje un grum di cjasis comedadis che però no si doprin! Tocje dome vê une cierte vierzidure mentâl a acetâ cheste robe.»
◆ Par chel che al tocje i zovins cjargnei, al dîs: «In chescj agns o ai vût une vore di sorpresis positivis dai zovins. O dîs simpri che i zovins di cumò a son miôr di chei di une volte, che a son plui brâfs, plui preparâts. E je un grum di int bule: bisugne valorizâle. Se tu jentris intune aziende tu âs di vê il timp par metiti in mostre: tu âs di cjapâti il timp e la pussibilitât di lâ a cirî ce che ti plâs a ti! Se no ti plâs un lavôr, tu restis un mediocri in chê fabriche li. Invezit, se ti plâs, di sigûr tu ti metis in lûs parcè che tu lavoris cun passion. Ancje cun cheste pandemie, jo e i miei fîs si sin cjatâts e o vin decidût di continuâ a lavorâ, di no fermâsi. Il mont al scuen lâ indevant. Nô o sin lâts indevant e cuant che il mont al è tornât a partî, o jerin za pronts. Une dificoltât no ti à di fâti rindi e di butâti jù. Il mont al va indevant plui o mancul di corse, e se al à un moment che si ferme, prepare simpri la stafe par cjapâ il svol dopo.»
◆ E cuant che si fevele de Cjargne, Mario al vierç il so cûr e al dîs «Par me la Cjargne e je un poç di savietât. O noti simpri la diference tra il vivi ponderât, pacific, trancuîl dai nestris paîs in confront cu lis grandis citâts indulà che no tu contis nuie. O ai vivût e lavorât a Vilès ma e je une altre robe, jo o starai simpri achì e no larai mai a stâ là jù. Miei fîs, cence nissun sburt di bande mê, a àn fate la stesse considerazion: Federico al partìs ogni dì di Tumieç, al va a Vilès e la sere al torne sù, ma nol va a stâ là jù. E chest al dîs dut, al dîs che il leam cun cheste tiere di Cjargne al ven di tantis robis: no dome parcè che tu sês nassût o parcè che tu âs cjolte la femine di ca sù.» ❚

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +