Sfuei Mensîl Furlan Indipendent
Archivi de Patrie

INCHIESTE: JEVE MILITÂR. Di un esercit di coscrits a un di volontaris professioniscj. Ma la tindince e je a tornâ indaûr

............

Formis di coscrizion obligatorie
a son implementadis
in 8 dai 28 Paîs de Union Europeane

Tai agns de vuere frede, il servizi militâr al jere obligatori pai oms in cuasi ducj i Paîs de Europe. Tacant cui agns ‘90, cul cambiament de situazion gjeopolitiche continentâl, la coscrizion obligatorie e je stade abolide in gran part dai Paîs de Union Europeane – par ultime la Gjermanie tal 2011 – intant che si passave di un esercit di coscrits a un di volontaris professioniscj.

Tai ultins agns, però, la tindince e je contrarie: la Svezie, che e veve scancelât la jeve tal 2010, le à ripristinade tal 2017, citant tant che resons l’ativisim militâr de Russie e il numar bas dai volontaris, e cheste volte clamant ancje lis frutis. Tal 2015, siet agns dopo vêle gjavade, la Lituanie e à reintrodusût la coscrizion obligatorie pai oms, in rispueste ae anession russe de Crimee dal an prime. E tal Lui di chest an, il guvier di Macron in France al à anunziât un program di servizi civîl-militâr di un mês pai frutats di 16 agns, che al tacarà tal 2019.

Ore presint, duncje, formis di coscrizion obligatorie a son implementadis in 8 dai 28 Paîs de UE: Austrie, Cipri, Danimarcje, Estonie, Finlande, Grecie, Lituanie e Svezie, come ancje in Norvegje e Svuizare, che a son fûr de Union Europeane. Chel culì sot al è un struc de situazion tai diviers Paîs.

Intun referendum tal 2013, i nestris confinants in Austrie a àn decidût, cuntune maiorance di cuasi il 60%, di mantignî une jeve obligatorie di 6 mês pai oms. In Austrie, Paîs neutrâl che nol fâs part de Nato, i coscrits a rapresentin cirche metât des fuarcis armadis, cul rest formât di soldâts professioniscj. Un tierç dai fantats austriacs al sielç però di prestâ servizis alternatîfs, che a puedin jessi il servizi civîl vêr e propri (9 mês) in struturis sanitariis, cjasis par anzians, Crôs rosse, Protezion civîl, associazionisim, o une varietât di servizis di volontariât (ecologjic, sociâl, cooperazion al svilup, educazion ae pâs) in Austrie, in Europe o (une vore popolâr) ator tal mont (10-12 mês).

In Svuizare, Paîs che al svante 500 agns di neutralitât e une popolazion convinte de necessitât de autodifese (il 73% al à votât par confermâ l’oblic di jeve intun referendum tal 2013), il servizi militâr al è obligatori pai oms e, par cumò, volontari pes feminis. Al cjape dentri un adestrament di base di 18 o 21 setemanis, plui cors anuâi di 3 setemanis par un totâl di 245 dîs di servizi; in alternative, il coscrit al pues servî par 300 dîs intune soluzion uniche. I obietôrs di cussience a prestin servizi civîl in varis setôrs, tal teritori svuizar, par 390 dîs. Une curiositât: cui che nol preste servizi militâr o civîl (cuasi il 20% dai coscrits), al scuen paiâ, fin ai 30 agns di etât, une “tasse di esenzion dal oblic” di trê ponts percentuâi in plui di Irpef, cun sconts se la persone e preste servizi te protezion civîl.

In Danimarcje – partner de Nato – il servizi militâr al è obligatori pai oms e volontari pes feminis; al à une durade di 4 mês, che a cressin fin a 12 in cierts servizis speciâi. In Norvegje la jeve e je di 12 mês e dal 2015 e je obligatorie ancje pes feminis (la Norvegje e je stade il prin Paîs Nato e il prin Paîs european a vê un oblic paritari). In pratiche, però, Danimarcje e Norvegje a àn esercits professionâi, cuntune necessitât di coscrits limitade (tal câs de Danimarcje, 4200 ad an, une piçule part di chei che a son clamâts ae visite di jeve) che e ven cuvierte cuasi dal dut di fantats e fantatis che si proponin in maniere volontarie. In pratiche, nissun al fâs il servizi militâr se nol à voie di fâlu. La situazion e je similâr in Estonie e Lituanie; ancje in Svezie une ferme efetive e rivuarde dome il 4% dai coscrits o coscritis.

In Finlande, un Paîs no inlineât cuntun lunc confin su la ex tindine di fier, la coscrizion e je obligatorie par ducj i oms parsore dai 18 agns, e volontarie pes feminis. Il servizi al à une durade di 165, 255 o 347 dîs; i obietôrs a prestin servizi civîl par 347 dîs. A diference dai vicins scandinâfs, l’80% dai fantats finlandês al fâs il militâr: une percentuâl tra lis plui altis dal mont. Une volte completât il servizi militâr, i coscrits a deventin riserviscj (il numar dai riserviscj finlandês al è il plui alt de Europe, dopo Russie e Turchie) e a puedin jessi clamâts a frecuentâ cors di inzornament.

La Grecie – Paîs che al fâs part de Nato – e à vût vie pai agns une ferme une vore lungje, fin a 36 mês, par vie dal stât di mobilitazion seguît ae ocupazion turche de part nord di Cipri tal 1974. Tai ultins agns, il Paîs al à cirût di movisi viers une riforme dal esercit in sens professionâl, ridusint tal 2009 il servizi militâr obligatori, limitât ai oms, a 9 mês pal esercit e 12 mês pe marine e aviazion; une scurtadure ulteriôr a 6 mês e je stade fermade par vie des dificoltâts economichis e dai coscj plui alts dal esercit professionâl. Te vicine isule di Cipri, simpri in consecuence de ocupazion turche, i oms a son clamâts a prestâ servizi militâr par 14 mês, continuant a jessi riclamâts tant che riserviscj diviersis voltis ad an.

I pilastris de Nato. I esponents principâi de aleance atlantiche in Europe – Gran Bretagne, Gjermanie e France – a son passâts di un biel toc a esercits professionâi: la Gran Bretagne, che no à mai vude une coscrizion obligatorie se no prime e dopo des dôs vueris mondiâls, ancjemò tal 1960; la France, il prin paîs a introdusi la coscrizion gjenerâl ai timps di Napoleon, tal 1996, e la Gjermanie tal 2011. In realtât, ancje la iniziative di Macron – un mês obligatori di servizi civîl o militâr par ducj i fruts di 16 agns, slargjabil su base volontarie par altris 3-12 mês – plui che resons di difese e somee vê l’obietîf di rinfuarcî il sens civic dai zovins francês e promovi la coesion sociâl. In plui, e fronte il probleme di ce fâ cui zovins jessûts dal sisteme scolastic che ancjemò no lavorin: dutis cuistions che a interessin di sigûr ancje il legjislatôr talian. ❚

Stefania Garlatti-Costa

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +