Sfuei Mensîl Furlan Indipendent
Archivi de Patrie

Il taramot cidin che al à sdrumade la nestre economie

Roberto Muradore

 

I numars de crisi a mostrin dîs agns di disgracie,
cjapade sot gjambe di ducj,
e pocjis prospetivis pal avignî

Il probleme dai problemis al è il lavôr e in Friûl lu è ancjemò di plui. Chest sedi parcè che la laboriositât dai furlans e je simpri stade di preseâ, ma ancje e soredut parcè che di tancj agns il lavôr al mancje pardabon. La pierdite di puescj di vore e je stade determinade de crisi economiche che e à colpît dut il senari globâl, ma la nestre tiere in maniere une vore grivie. I nivei ocupazionâi a van daûr de reditivitât che la economie e je buine di produsi e di meti sul marcjât. E alore al covente vê iniment che tal periodi 2008-2018 la economie dal F-VJ e à pierdût une fete di redit dal 8,5% come risultât dal sdrondenon de crisi planetarie che dut câs si è fermade tal 2013. Al va dit cun marum che chenti la situazion e stade cjapade sot gjambe un tic di ducj, fale pocjis e laudabilis – ma no par chest scoltadis – ecezions.

–

A pôc e à zovât la riprese flape che si è manifestade dal 2014 al 2018. Invezit, al va marcât che il redit pierdût des trê ex provinciis di Gurize, Pordenon e Udin al è dal -11,2%, intant che invezit la ex provincie di Triest e à viodût cressi la sô economie dal 2,3%. E ocjo: la pierdite di redit de aree furlane e je pardabon compagne a chê de Basse Italie, e la ex provincie di Udin e je piês di dutis, stant che e piert il 16%! Cun chestis premessis, al è clâr che tal interval 2008-2018 il salt negatîf de ocupazion de aree furlane al è dal -2,9%: si trate di plui di 12 mil personis. Invezit a Triest il salt al è positîf, dal +4,9%, ven a stâi 4.639 ocupâts in plui. Lant a cjalâ miôr, la manifature e la edilizie a son i setôrs che a patissin di plui. E chescj a son di simpri i comparts che a stan aes fondis de nestre economie. Il Friûl al à pierdût in 10 agns il 17,3% dai ocupâts intal setôr industriâl, intant che a Triest la pierdite e je stade dal 8,7%. E intal stes periodi, la ex provincie di Udin e à pierdût il 24,9% dai siei lavoradôrs tal setôr industriâl. E je une pierdite une vore grivie parcè che chest setôr al paie par solit miôr dal terziari, che achì dispès nol è masse “avanzât”, cun tancj contrats che a rivuardin lavôrs no cualificâts, retribuzions plui puaris e une fuarte precarietât dai rapuarts di lavôr che no garantìs prospetivis pal avignì.

Un altri element di considerâ e je la esplosion de cuantitât di fuarce lavôr che e je restade a pît: dal 2008 al 2018, in F-VJ la int inocupade e je cressude dal 46,5%, rivant a plui di 72 mil personis disocupadis, che no cirin lavôr o che a son cuviertis par un ciert periodi di amortizadôrs sociâi. Ancje in chest la ex provincie di Udin e cres plui di chês altris: adiriture dal 71,6%.

Lis robis a son tant mâl metudis che nol è di maraveâsi se i nestris zovins che a van pal mont a cirî fortune a son cetancj plui che tal rest de Italie. Ancje i imigrâts a van inaltrò parcè che nancje par lôr a sono tantis lis ocasions di lavôr. Al covente alore che i sorestants locâi des istituzions, de politiche, de economie, dal mont dal lavôr si dedin dongje par rilançâ il Friûl. Par fâlu, bisugne che ducj a madressin une cussience dal stât reâl de situazion e che a mostrin une voie convinte di tornâ a fâ partî la nestre economie, cussì come che al è sucedût dopo dal taramot dal 1976. E, in efiets, i numars nus disin che un gnûf Orcolat nus à sdrumât il contest economic e sociâl, ancje se tancj no si son visâts. Dome cuntune analisi corete de situazion, cence lassâsi lâ ae avilizion o licuidâ la situazion daûr di un otimisim interessât o di maniere, si pues tentâ di vignî fûr des dificoltâts. No je dome une ricete par fermâ il declin. Ma se no sarìn bogns, insiemi, di cambiâ cheste tindince, pe int furlane, massime pai zovins, si fasarà simpri plui grivie.

Lis cundizions e lis potenzialitâts par tornâ a meti in vore pardabon il nestri Friûl a esistin. I rapresentants des istituzions politichis e sociâls a varessin di lavorâ a une “CONFERENCE PAL FRIÛL” che ju viodi metisi dongje par progjetâ l’avignî de nestre tiere. Nissun di lôr, di bessôl, al è in stât di frontâ e di risolvi chest vêr dileme che si presente devant di nô. Ognidun, dut câs, al pues ufrî il so contribût di cognossince e di propueste. La Cjamare di Cumierç, che e à za inmaneât moments impuartants di riflession cul “Friuli Future Forum”, e la Universitât di Udin (si lei “dal Friûl”), cul so “Cantiere Friuli”, a podaressin coventâ une vore a stiçâ chest procès. Ma se no rivarìn ae svelte a dissegnâ e a meti in pratiche un percors di rivitalizazion de economie e de societât di chenti, o condanarìn lis nestris comunitâts a pierdisi e a dispierdisi intune gnove diaspore. Come dutis lis crisis, ancje la nestre – magari cussì no – e je prin di dut culturâl e morâl, e e scomence dal cinisim di buine part dai sorestants, che a somein plui interessâts al lôr destin personâl che al ben comun. Ma chi al covente che a stâ ben no sedin dome i rapresentants, ma pluitost i rapresentâts! ❚

 

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +