IL SIVILOT. Friûl striçât

Al somee simpri di plui che Triest al sedi deventât pardabon il bugnigul dal mont. In ducj i partîts si fevele dome dal so snait, des pussibilitâts europeanis pal puart, pes feroviis. Cence dismenteâsi che cul “Fondo Trieste” dai agns Cincuante in ca a son plovûts in place Unità d’Italia passe 6200 miliarts…
No stin a fevelâ dal sindic Cosolini: Tondo in confront al è un diletant. Al è lui che al va a tratâ a Rome, simpri lui che al disegne lis liniis feroviariis, che al decît i puescj tai ospedâi: cualchidun al dîs che ancje la tiradure dal Piccolo e passi pal so ufici.
Brâf lui, e monis noaltris. Anzit, no noaltris ma chei politics furlans che o vin mandât in Regjon.
Cosolini al fâs il so mistîr e i interès de sô citât. I nestris rapresentants cuant che e va ben a stan cidins: se a disin alc, di sigûr  al è a pro di Triest, sot il non de unitât regjonâl.
Cjalait la ultime “boutade” de Euroregjon. O vin firmât un tratât cun Carinzie e Venit al puest di chel vecjo da la Alpe Adria. Ce nus vegnial te sachete a noaltris furlans? La capitâl e sarà Triest, l’interès dal venezian Zaja e i afârs di Klagenfurt.
Puar Friûl, simpri plui tiere di passaç, cun nissun che si ferme. A fâ ce? A cjalâ lis mumiis di Vencon?
Che tra l’atri a àn la muse compagne di chei che a stan sentâts in Consei regjonâl, ma almancul a stan cidinis.
L’OM DI BURI