FRIÛL FUR DAL FRIÛL. Un Friûl autentic di chê altre bande dal Mont

In Friûl e je rivade la Vierte e cu lis cisilis ancje il sut. Un sec che no si viodeve da agns, ma graziis ai consorziis di bonifiche e ai sistemis di irigazions, i dams in agricolture a saran limitâts. Di chê altre bande dal Mont in Argjentine son i mês da la Sierade e cun jê grant al è il lavôrs e bielis a son lis fiestis par la vendeme.
I nestris furlans di Argjentine che a vivin ta la provincie di Santa Fè a son grancj produtôrs di vin e brâfs agricoltôrs, par chest la Regjon Autonome Friûl-VJ, la Provincie di Gurize, l’E.R.S.A., i consorzis di bonfiche da la Planure dal Lusinç e da la Basse, la federazion regjonâl da lis bancjis di credit cooperatîf e “Ente Friuli nel Mondo” a son daûr a promovi un progjet di cooperazion internazionâl pal disvilup di un sisteme di irigazion similâr a chel dal Friûl e par fâ cognossi il model da lis bancjis di credit cooperatîf. L’Assessôr Regjonâl a la Agricolture Claudio Violino al à volût viodi di persone cemêt che e jere la situazion socio-economiche e culturâl dai nestris furlans di Argjentine e tal mês di Març al à incuintrât là vie lis associazions dai furlans di Buenos Aires, Avellaneda di Santa Fè e Colonia Caroya. Doprâ il “canâl” dal associazionisim furlan par difondi i prodots tipics e la culture furlane al è tra i obietîfs che a àn viodût in acuardi sedi l’Assessôr che i presints. Fuarte e je la volontât dai furlansargjentins di viodi rinfuarcide la lôr cognossince de lenghe furlane midiant di Internet, i scambis di zovins, lis manifestazions culturâls ma ancje lis consulencis di caratar tecnic tant che la tutele dal salam di Colonia Caroya, il plui famôs (e furlan) di Argjentine, prodot di cualitât ma che al varès dibisugne di un dissiplinâr simil a chel dal persut di Sant Denêl o dal Montâs. Ta la colonia caroyense fondade tal 1878, tra cjars parecjâts, cjants, specialitât alimentârs, ricuarts e storiis, miârs di furlans a àn partecipât a la fieste de ue. Fuarte la emozion dal Assessôr Violino che al à declarât: «E je pardabon une fieste di no pierdi e che ti fâs sintî di jessi tal Friûl plui autentic». ■
Daniele Martina
_____________________________________________________________________
LA SGRIFE – VONDE! VONDE! VONDE!

Pieri Villotta al è stât nomenât vicepresident vicjari di “Ente Friuli nel Mondo”. I augurìn bon lavôr, parcè che a ‘nt varà une vore! Sperìn che al rivedi a frenâ la talianizazion dai fogolârs stant che ai 14 di Març al è stât screât il “Proyecto Viva Italia: curso de italiano” tal “Centro Friulano” di Colonia Caroya” (http://www.friuli.org.ar/italiano.html).
_____________________________________________________________________