Il lat al va…. in polvar: la ordenance UE che e permet di fâ formadi cun chel e lis conseguencis pe filiere

No si sa se al è il periodi storic (che, cul davoi des bandis di Atene, la Europe nol è che e sedi gran ben volude), o che forsit i furlans a viodin ros dome a pensâ al câs disgraciât dal Tocai.
Fat al è che cuant che a son jessûts titui che a disevin di “UE: in Italie formadi cun lat in polvar”, a nô furlans (e no dome a nô, par dut il “stivâl”) al è partît un fastidi gjenerâl, ducj alarmâts pe idee che il nestri patrimoni agroalimentâr – il plui preseât dal mont – al puedi jessi straçât dai cavîi di cuatri burocrats a Bruxelles.

NO AL ALARMISIM
Forsit, però, prime di fâsi cjapâ dal panic, al è il câs di fâ un pocje di clarece.
Dut al scomence cuntune procedure di infrazion che la Comission Europeane e à vierzût tai confronts de Italie, par vie di une leç (la numar 138 dai 11 di Avrîl dal 1974) che e viete aes industriis talianis di doprâ lat in polvar, ancje parzialmentri, par fâ formadi. Leç che e sarès une distorsion tal marcjât comun de UE, che e fasarès cuintri ae “juste concorence”.
E chest – tant par sclarî –  no vûl dî obleâ nissun a doprâ il lat in polvar impen dal lat, ma dome dâ une pussibilitât in plui.
Dit che – clarementri – il formadi fat cul lat in polvar nol è dal sigûr velen (il formadi fat cun lat fresc no controlât al sarès ben piês…), e vâl la pene di impensâsi che za di cumò, su lis nestris taulis, a son formadis fats cussì, parcè che la leç e viete il lat in polvar ai produtôrs talians, ma no dîs nuie sui formadis di importazion (dome indicazion in etichete, ma sôl se finîts di lavorâ in Italie).
UNE OCASION DI MIORAMENT
E alore – forsit – cheste iniziative europeane e podarès jessi ancje la ocasion, pal nestri Parlament, di fâ buinis normativis plui severis su lis etichetis, di mût che – forest o nostran che al sedi – il consumadôr al puedi savê cemût che chel toc di formadi al è stât fat e sielzi “in sience e cussience”. Parcè che il formadi produsût in maniere industriâl cul lat in polvar in gjenerâl al coste di mancul, e vê formadis di cheste fate (e a son za) e je une sorte di concorence sleâl tai confronts dai nestris formadis di cualitât.
Un altri element impuartant di tignî iniment al è che i nestri formadis plui tradizionâi e preseâts a àn in pratiche ducj la denominazion IGP, DOC o DOP, che al vûl dî che – a mancul che no sedin trufis bielis e buinis – par podê vê chel non i produtôrs a àn di aderî a “dissiplinârs” specifics, no son sants, e a mancul di no jessi tant pandolos di scambiâ un Parmigiano Reggiano DOP cuntun “Parmesan” fat in Australie, su la pastesute i talians a laran indevant a gratâ chel formadi emilian tant bon fat di plante fûr cun lat crût. Stesse robe pal nestri Montâs, pal Asiago, pal Gorgonzola e par chês altris perlis de tradizion casearie nostrane.
Alore, cheste volte – forsit – impen che inrabiâsi cun Bruxelles, cjapìn la ocasion par fâ un tic di informazion alimentâr, spiegant a la int la impuartance di informâsi ben su ce che si compre, e par fâ pression par vê regulis simpri plui claris su ce che si cjate tai negozis. ❚
Margherita Timeus