ITALICUM: une “mission impossible” par dôs minorancis

L’Italicum par sigûr nol à tant che obietîf chel di zovâ aes minorancis, ni politichis, ni linguistichis, dal Stât talian. Ma chestis minorancis a son: e a varessin di jessi lis primis a sburtâ par jessi ricognossudis a nivel di rapresentance. Cualchidune lu à fat: trentins e sudtirolês a àn otignût il coleç eletorâl unic inte lôr regjon e cussì i valdostans. Invezit i parlamentârs dal Friûl-VJ no àn nancje provât: miôr no lâ a movi pucis, si sa mai che nissun si inacuarzi…
DIVISION_ E invezit la int si è inacuarte che la fertaie aromai e je fate, e cun la division de Regjon in doi coleçs eletorâi pratichementri definitive, sedi la minorance slovene che chê furlane a son stadis minoradis inte lôr capacitât di esprimi un lôr rapresentant ae Cjamare dai Deputâts, che inte prossime legjislature – se si fasarà la leç – e sarà la uniche eletive. I slovens a vevin provât cu la senatore Tamara Blazina a cirî di costruîsi une “risierve” par rivâ a un elet: ma i numars dal Italicum a son masse pençs par garantîlu, e la Blazina e à scugnût gloti l’inseriment tal so coleç di 44 comuns furlans, gjavâts al teritori de Provincie di Udin. Dificil a chest pont pai slovens rivâ a puartâ a Montecitorio un dai lôr, se nol sarà metût tant che cjâf di liste inte liste blocade dal Pd. “Mission impossible” o cuasi.
INDURMIDÎTS_ Se almancul i slovens a àn tentât, i furlans in Parlament intant a durmivin: e il teritori de lôr comunitât linguistiche al è stât çoncjât brutalmentri in doi e i 12-15 mîl vôts di preference necessaris a saran dificii di racuei. La uniche soluzion, ma la sfide e je pardabon dificile istès, e sarès chê proponude dal conseîr regjonâl sloven Igor Gabrovec: creâ un “liston” des comunitâts linguistichis regjonâls, che al meti insiemi furlans, slovens e todescs. Une propueste che e larès sclaride e dibatude, cence prejudizi: ancje parcè che, se l’Italicum al passarà, no son alternativis. ❚
✒ W.T.