Sfuei Mensîl Furlan Indipendent
Archivi de Patrie

La prime sentade de Assemblee de Comunitât Linguistiche Furlane, un organisim pal popul furlan

............

“Cumò i furlans a àn un imprest une vore impuartant par fâ sintî la lôr vôs. Covente pardabon savêlu doprâ par dâ valôr ae nestre lenghe, ae nestre int, ae nestre tiere”: al è cussì che il sindic di Udin Furio Honsell al à batiade la scree de Assemblee de Comunitât Linguistiche Furlane, che ai 15 di Lui e à celebrade la sô prime sentade intun Salon dal Parlament dal Cjistiel plen di sindics che a àn pandût cu la lôr adesion la voie di manifestâ fin insom la lôr identitât. A son 74 i Comuns che a àn declarât di volê jentrâ a fâ part di chest gnûf organisim e 55 chei che a àn za aprovade la partecipazion. Buine part di chescj sindics a àn sielzût tant che president de Assemblee il prin citadin di Cjarlins Diego Navarria, e come so vice il so coleghe Piero Gerometta di Vît.
STIÇÂ LIS CUSSIENCIS
“O volìn stiçâ la cussience identitarie dai furlans – al à afermât il president tal so discors di “invistidure” – e afermâ il valôr de nestre autonomie. No volìn jessi considerâts i “boni et fideli furlani” che Vignesie e stimave tant che siei sotans”. Par sclarî la sô determinazion, Navarria al à tacât dal prin obietîf, che al è ancje chel istituzionâl plui diret de Assemblee: la lenghe furlane. “Tancj le stimin robe di museu, ma o sin nô che o vin di mostrâ cu lis ideis e cui fats che la marilenghe e je un valôr, un dirit e une oportunitât e che e pues jessi ancje un valôr di cressite economiche pe nestre comunitât. Ma stant che la lenghe e je la semence di un popul, no si pues ocupâsi de lenghe cence ocupâsi dal popul” al à imprometût il gnûf president, sclarint che “achì no saran indenitâts ni prebendis di spartî, no je nissune straçarie pai contribuents ma chest al è un orghin di rapresentance cressût dal bas”. E se si pense che intun an de presentazion dal emendament che le à istituide, la Assemblee e à savût organizâsi e rivâ zaromai a dâsi dongje, il procès che le à vuidade al lasse scaturîts.
UN LAVÔR CHE AL SCOMENCE CUMÒ
No son stâts dome i sindics a dâ il benvignût ae gnove assemblee: ancje i conseîrs regjonâi Claudio Violino, Vincenzo Martines e Vittorino Boem. Il prin al è stât chel che al à volût cun plui fuarce la costituzion de Assemblee presentant l’emendament aprovât dal Consei, il secont le à sostignude cun fuarce te Comission deputade, il tierç al à poiade la sô realizazion cun convinzion. Dut câs, il lavôr al scomence cumò e lis liniis di vore lis à tiradis propit Honsell intal so intervent, che al à metût dongje la storie de idealitât e de identitât furlanis cun propuestis une vore operativis. Par memoreâ la tradizion di autoguvier al è partît dal Parlament de Patrie (“nassût prin de Magna Charta inglese”) e de istituzion de Contadinance (“dulà che la int e sielzeve sindics come noaltris, e duncje e somee la nestre Assemblee”) par rivâ ae tradizion culturâl furlane di Graziadio Isaia Ascoli, Pier Silverio Leicht, Gaetano Perusini, Vincenzo Joppi: un contribût declinât ancje al feminin cun Lea D’Orlandi, Novella Cantarutti e Silvana Schiavi Fachin e che vuê al cjate snait in studiôs tant che Zuan Frau e Fidrì Vicario. Ma che si è smamît in politiche dulà che il pinsîr autonomist – nassût daspò de vuere prin intor al Moviment Popolâr pe Autonomie di Pier Paolo Pasolini, Josef Marchet e Zuanfranc D’Aronco, e po disvilupât di Tiziano Tessitori – nol cjate vuê une vôs uniche, ma si piert in tancj riui diferents, dispès in lote fra di lôr. “Che la Assemblee e fasi sintî cun fuarce l’interès dal Friûl a rinfuarçâ i siei as di comunicazion di stradis e feradis e a meti dongje i gjestôrs dai servizis publics di rêt” al à auspicât Honsell: e cheste e je za une propueste – anzit dôs – di meti in discussion te gnove Assemblee dai Furlans, che no viôt la ore di lavorâ. ❚
Walter Tomada

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +