Sfuei Mensîl Furlan Indipendent
Archivi de Patrie

EDITORIÂL – Doprâ la nestre identitât e je la uniche strade buine

............


✽✽ Il Salon dal Parlament tal Cjiscjel di Udin al fâs simpri la sô figure. Ti tocje alc dentri, cuasi a visâti de tante storie de nestre Patrie. Di plui inmò se la int che e je li no je par une conference, ma par meti neri su blanc la nassite di une istituzion furlane. Se, po dopo, i atôrs di cheste presince a son i sindics, la ocasion e je ancjemò plui impuartante e vivarose, viodût che propit i sindics a son la uniche forme restade de democrazie e de volontât popolâr dai eletôrs. La creazion duncje de Assemblee des comunitâts furlanis, jenfri la riforme dai ents locâi volude de Regjon, e je un sucès e no un contentin de Serracchiani o, piês ancjemò, une pidade cuintri il Friûl dopo la sieradure des provinciis, come che cualchidun al sta disint. O crôt che si à di jessi une vore clârs su cheste cuistion: nol è il gnûf stât furlan e nancje une forme di autoguvier. Al sarès di gnognos pensâ che i sorestants e i politics a sedin cussì autolesioniscj di regalânus cheste ipotesi. Darest, se un grup dirigjent centralist al ves cjapât un troi dal gjenar, di sigûr la freadure e sarès daûr dal cjanton. No. E je une rispueste che e ven dal bas, di mediazion se o volês, ma che pe prime volte e à viodût une sielte trasversâl no antifurlane in Consei regjonâl, e il metisi in zûc in prime persone dai aministradôrs locâi. O zontarès ancje une altre robute: e je vere che si partìs de difese e dal ricognossiment de lenghe furlane, ma po dopo ancje chi neri su blanc, si fevele di interès gjenerâl dal teritori furlan ancje tai setôrs de identitât, de economie e dal ambient.
✽✽ Di front ai atacs simpri plui fuarts ae autonomie, ae specialitât, cheste assemblee e je une des dôs gjambis de difese. La seconde e je chê de Regjon, e viodûts i rapuarts di suditance de politiche de zonte rispiet al podê roman, mi somee propit che in vuere si larà cuntune gjambe sole.
✽✽ La riprese duncje de cussience identitarie di bande di tancj zovins aministradôrs e je un biel segnâl che nol va scjafoiât o cirût di comandâ. La esperience dal “Laboratori di autonomie” e je stade une dimostrazion vincente di cheste gnove mentalitât. Il jessi rivâts a madurî un risultât come chel de assemblee dal Cjiscjel e je une prime logjiche conclusion.
✽✽ Ma la robe plui impuartante di chest moment storic pal Friûl e je il concet di fonde che al môf dut: dome midiant di une leture identitarie si puedin frontâ lis emergjencis di vuê.
No esist une ricete economiche, e nancje ideologjiche, par rispuindi aes problematichis dal nestri Friûl. Dome la cussience dal rapuart tra teritori e popul, tra cussience e responsabilitât, il superament dal individualisim e la ricercje dal ben comun a dan la pussibilitât ae nestre int di podê pensâ a un doman diviers di chel che la logjiche dominante e à tal cjâf.
✽✽ No son altris stradis pe nestre zoventût, ma nancje par noaltris. ❚
Dree Valcic

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +