Il grup furlan dai LaipNessLess di là dal clap cul tour Lis Maglis di Muzane. Us contìn ce che a àn cumbinât

Dopo une ricercje di ostarie in frascje o vin finalmentri scuviert dulà che al è lât a finî il Mostro dal Cormôr. E no induvinarês mai fin dulà che al è rivât. De lagune di Maran, passant pal Cormôr nol à dome traviersât il Tiliment, ma ben al è lât fin a Milan.
Cun El Scovace, l’Alien di Mortean e dute la musiche furlane plui politichementri scorete, i LaipNessLess a àn tornât  a fa sintî la lôr bestialitât cuntun gnûf tour delirant, dal titul Lis Maglis di Muzane 2016.
I dispreseabii e cence pêi su la lenghe LaipNessLess che, tacant dal 2014, si son fats cognossi pes ostariis di dut il Friûl puartant sul palc Bestie feroci e il Mostro dal Cormôr tour, a àn ancjemò une volte cjariât il furgon di damigjanis di vin e struments e a son partîts par une gnove butade di concierts.
la formazion no je cambiade: o vin un aligatôr al cuintribàs (Davide Sciacchitano), Jack La Nutria ae ghitare (Jacopo Casadio), e l’imperadôr de Basse furlane ae vôs (Rudy Citossi).
Lis Maglis di Muzane Tour e duncje la prime aventure internazionâl di chestis bestiis sunadis e je tacade di Milan. Par zontâsi al pes di Avrîl, Il Crocodîl, El Scovace e l’Alien di Mortean a son stâts presentâts al public milanês al prin di Avrîl al C.S.O.A. COX18 di Milan. A introdusi la performance nol podeve mancjâ il grant Fabian Riz.
La presince di Fabian Riz e à fat scalfûr, parcè che chei di Milan a àn dedicât al cjantant la gnove cuvierte di Glamour, dismenteant i LaipNessLess, simpri plui indignâts.
La esibizion dal grup e je invezit lade a finîle in mondovision e si pues cjatâle sul sît dal COX18: https://cox18stream.noblogs.org/post/2016/04/01/fabian-riz-orchestra-laip-ness-less/.
dopo la esibizion internazionâl di milan, di dulà che no crodevin mai plui che a tornassin vîfs, i LaipNessLess a àn continuât il tour otignint une grande rispueste di public ancje a Vignesie, tal Laboratori Occupato Morion, e a Sant Zuan dal Nadison, te Associazion Rozaleo. Ta chestis dôs datis, il grup no si è fat mancjâ sul palc un ospit di ecezion: l’Insonne cun tant di jet e water.
Ducj i concierts dal gnûf tour a cjapin dentri i tocs vecjos, simpri valits e bestiâi, e cualchi gnove hit. Tra lis plui cuotadis di simpri Udine spara, Muzzana risponde e il blues de Nutrie. Lis gnovis comparsis sul palc si confermin El Scovaze, une version furlane di “er monnezza” e l’Insonne.
intant par capi miôr ce che a son lis maglis di muzane o podês lâ a viodi il gjornâl des aventuris dal grup su http://laipnessless.blogspot.it.
Di ce che a scrivin, nancje lôr a somein masse convints: «No si capìs fin insom… e par cui che al à capît forsit al jere miôr no capî. De Ete di Mieç a Muçane dal Turgnan a àn tacat a vignî fûr stranis maglis. Al è cui che al dîs che za cul imperi roman la robe e fos cognossude cussì tant che di chest al è nassût il non di Muçane, dal latin muccus (lidrîs ebraiche: muq) cul significât di secrezion, muc, in conseguence a sostancis che come un brût a bulecin tes palûts.
Muc. Muc tignût distant dai romans e che al faseve pôre come il demoni te Muçane medievâl.
Tacjis. Tacjis che la “silva lupanica” e à parât par secui.
Maglis. Maglis che il boscam al à platât di timps dismenteâts… fin a vuê.
Lis Maglis di Muzane a son tornadis, amiis dai debii, salvadiis profetis dal mâl cui potents, dispietadis cui vîi e gjenerosis cui ardîts. Il tour dai LaipNessLess al celebre lis maglis di Muçane. Cun timôr.»
spietant ancjemò di capî ce che al è e cemût che al larà indenant Lis maglis di Muzane Tour 2016, i LaipNessLess us spietin ai lôr prossims concierts. Al è confermât che dopo il sucès a Milan il grup al continuarà la sô montade musicâl a nivel internazionâl, ma pal moment ju podês simpri cjatâ tes miôr ostariis e frascjis daûr cjase. ❚
✒ Moira Pezzetta