Storie e poesie de Cjargne a traviers de anime di Ferigo La Societât Filologjiche Furlane i dediche l’event finâl de Setemane de culture

Zorç Ferigo, dotôr in medisine e in chirurgjie, storic, poete, cjantôr cjargnel. Une anime critiche di grande profonditât, curiôs di cognossi e rigorôs tal cirî, fintremai ordenât e puntiliôs tal meti dongje cjartis, documents di ogni sorte, inte sô vaste Babêl di interès, desiderôs di savê  e di contâ. Ferigo al è stât e al reste un di chei oms che a mancjin ae Cjargne, al Friûl e plui in gjenerâl ae comunitât dai savints. Sclet, spiçât, ironic, fin, ma fintremai rognôs cuant che al coventave. Al jere un di chei che no le mandave a contâ. A son plui o mancul 160 i siei contribûts, tra contis, saçs, recensions, monografiis, antologjiis, traduzions e cui plui al à, plui al meti. Cence mai dismenteâ lis sôs cjançons, inte maraveose esperience dai Povolâr Ensemble.
Promotôr tra i plui atîfs, animadôr culturâl in gracie di un frescum morâl e inteletuâl, al è stât, tra tantis robis, soci fondadôr dal Coordenament dai Circui Culturâi de Cjargne, membri dal grup I ultins di Tumieç, diretôr dal Museu Cjargnel des Arts Popolârs “Michele Gortani”, promotôr di iniziativis editoriâls tant che il Strolig Culturâl de Cjargne, Cjargne Culture, vice president pe Cjargne de Societât Filologjiche Furlane, soci de Societât Nazionâl dai Operadôrs de Prevenzion, inte sô grande bataie leade ai riforme e semplificazion burocratiche de sanitât publiche.
Sabide ai 15 di Mai, la setemane de Culture Furlane e dediche a Ferigo un spetacul conciert pai dîs agns de sô disparide, inovâl che al cole ai cinc di Novembar dal prossims an. Il poliedric inteletuâl di Povolâr, Zorç Ferigo, nol mancje mai di jessi ricuardât de int, che si vise di lui cun afiet e tante stime. Al somee però che pôcs o nissun a vedin vût l’ardî di continuâ la sô opere enciclopediche, di svilupâ e di fâ cressi la sô preziose e consistente ereditât, cetant ricje e forsit masse penze. La plui ative, un pont di riferiment impuartant, e je la Associazion Culturâl Zorç Ferigo (giorgioferigo.net), che e slargje cun variis e impuartantis iniziativis e testemoneancis, la imagjin concrete di un grant pensadôr, un riferiment che al merete di jessi cjapât tant che esempli. ❚
✒ Alessio Screm
___________________
Cjargna Fidelis
Us proponìn, cu la grafie origjinâl, il test di cheste poesie lete cun acompagnament musicâl di Zorç Ferigo, un dai siei tocs mancul cognossûts. Scoltile te nestre pagjine Facebook «La Patrie dal Friûl»!
Strenta dai mûrs e dal cûr
Cjargna blancja di claps e di dûl
Cjagna mama ca gugja e a respira cuieta
Cjargna viola ca spieta la nêf e riva la ploia
Cjargna clip dal gno iet e nu passa la voja
Cjargna fidelis, Cjargna cencia diu, Cjargna ledrôsa
Cjargna saìn e argjel, Cjargna vinosa, Cjargna ormai
flipper, coca-cola e patatine Pai.
Cjargna d’atom, di larz e di faus impiada
Cjargna cartulina par turiscj di fin setemana
Cjargna bla-bla da Filologjica putana.
Cjargna cunina ca feda e a dispiert i cjargnei
Cjargna forêt di Quebec, scaffoldings of Sydney
winter in Zürik, moulin tai Pirenei.
Cjargna dulà che la domande no è nomo
«parcé vano?», ma encja «parce tornino ca?»
Cjargna dulà che encja tornâ dongja al’è un emigrâ.
Cjargna amôrs par telefono, supa-nots ai lontans.
Cjargna grant ospizi, Cjargna pizighet, Cjargna INPS
ca sotera pensionâs ogni volta cal ve frêt.
Cjargna cirrosi, vin ca nol basta a studâ la granda sêt.
Cjargna poianas in svuait, mercjadants di tramonts,
gramulas di massa pasciûs, stomis taronts
Cjargna coma dapardut, operaris e parons.
Cjargna Gortani e la Sade a ti an fata suta
Cjargna i saragatians a ti an spelada su duta
Cjargna dal Pal Piciul al Bievera simpri gueras pierdudas.
Cjargna dal Lumiei al Cjarsò cu la man spalancada
Cjargna avara e amara, man avara scierada.
Cjargna scierada la man e al è un pugn alçât.