Di jerbas e di suns. La Spoon River di Ferigo ae Setemane de Culture Furlane

Lunis ai 16 di Mai aes 20.45 tal Teatron di Udin, come event finâl de Setemane de culture furlane, al vignarà metût in sene il spetacul in forme di teatri-cjançon dedicât a Ferigo, dal titul “Di jerbas e di suns, musiche e peraulis par une Spoon River cjargnele”. Ideât di Annalisa Comuzzi e Francesca Valente, il spetacul al è un omaç a Zorç Ferigo e ai Povolâr Ensemble, incentrât sul secont album dal grup: “Cjant dai pierdûts amôrs”, dal 1983. Rilet dal compositôr e rangjadôr Mauro Costantini, in compagnie di un coletîf di musiciscj, musiche e narazion si vegnin incuintri par contâ la vite dai cjargnei te maniere di Edgar Lee Master. Cussì il cimitieri di San Zorç a Comelians, al devente un spazi di memoriis e contis par tornâ a vivi lis liendis, fatis di amôr e di soferencis, di une piçule comunitât, intune maniere dal dut lontane dai stereotips consumâts de tradizion leterarie e musicâl. In ocasion de date finâl al Teatron, al vignarà ancje presentât il cd omonim, dulà che oltri al spetacul, si conte la Cjargne di Ferigo midiant imagjins, intervistis e materiâi inedits.  ❚
(✒ Al. Scr.)