La Centrâl | La storie de centrâl

Cuan’ che ere piçula nôs canais avean tanta libertà.
La matina dhian a scuola e al dopomesdì podean dhî in giru pal paeis o su pai cuoi a tole ciclamins. A pensae ben fean ancja robis un pôc pericolosis…
A me ven in mente che, cuan’ ch’al cuminçava a fâ cjalt dhian a vede al zardin de la Centrâl ch’al era sempre ben curà e plen de flours.
Da uvì dhian fin sul “Bacin” dulà che par fortuna nessun de nôs a colava dentre e tornant indavour, par un’altra strada, fean al bagnu inta li poscjis de aga bassa che i se formava tra i salts del cjanal.
Stean uvì a dhuâ inta li vascjis fin che avean voia.
Cualche volta podean dhî dentre la cjasa del capo centrâl, passean tra tanti puartis e man man sintian un rumour fuart tant che no podean ne parlâ ne sintî.
Çamò voi cuan’ che vai in Centrâl (a è diventada un museo), in ocasion de cualche mostra o de cualche altra fiesta, a me par de sintî l’aga che curint dentre i tubus a feva girâ li palis de li turbinis.
In chê volta no saveve che al “rumour” ch’al me sturdiva al cja e li vorelis al aveva impiâ, par la prima volta, li lampadinis dei lampions de la plaza San Marc de Venezia.
✒ Patrizia Cossutta.
Test scrit in variante malnisiane di Patrizia Cossutta, mestre di Malnîs. Si ringrazie Pier Carlo Begotti pe colaborazion.
Note su la grafie: in cualchi variante furlane dal Friûl Ocidentâl par peraulis tant che “zovin” si dopre il sun “d” al puest di chel de “z” che al ven segnât cul digram “dh”. In cheste variante, o ricuardìn che nol esist il sun “palatâl” e la “j” si lei come e fos une i normâl (cian e giat).
_______________________________
La storie de centrâl
Dal 1900 al 1905 plui di doi mil minadôrs, pichepieris, muredôrs, cjarpentîrs e puartadoris a àn lavorât ae costruzion de grande struture che e puartà la iluminazion publiche a Vignesie. Maestose te Pedemontane pordenonese, la Centrâl idroeletriche “Antonio Pitter” di Malnîs, tal comun di Montreâl, e je un esempli ecezionâl di architeture industriâl dai prins dal Nûfcent. In funzion fin al 1988, e je sorevivude a dôs vueris mondiâls e al taramot dal 1976. Vuê al è un museu gjestît dal “Science Centre Immaginario Scientifico” (www.immaginarioscientifico.it), li che si puedin viodi conservâts in maniere perfete i machinaris origjinariis, simbui de aventure tecnologjiche che e fasè dal torint Ciline une straordenarie font di energjie pal Venit e pal Friûl. Pecjât dome pal cjanâl che al dave dongje la aghe de centrâl, lassât bandonât di chê volte tal mieç dal paîs, che tancj malnisians a volaressin viodi biadelore bonificât. (Nat. Gar.)