IL GRANT LUNARI DAL FRIÛL. Lui

IL SORELI, LA ATMOSFERE, LA NATURE
Il soreli al sflandore alt tal cîl setentrionâl, ma dì dopo dì al tache a la jù e a scurtâ lis zornadis. I paisaçs e i cuadris de nature a son i plui vivarôs e madûrs, dispès sometûts al grant cjalt e al scjafoiaç; i animâi a stan tal ripâr des frascjis e de ombrene, cemût che al tache a fâ ancje l’om pe polse dal Istât des voris prime des vendemis. De metât dal mês al pues fâsi sintî il sec, che la tradizion meteorologjiche furlane lu slargje par po sù po jù un mês, fin ae metât di Avost. Par so cont, cu la jentrade dal segn zodiacâl dal Leon e par dute la sô durade (23.VII-22.VIII) si à il timp de Canicule, event meteorologjic pericolôs e nefast, secont la tradizion, pes coltivazions, la nature (tiere, aghis, semencis, ferments, vin e v.i.), i animâi e l’om.
VORIS DAL CICLI AGRARI
Si finìs la seseladure dal forment e ancje la batidure. Il contadin al pues alore polsâ sot de ombrene des piergulis biel che il soreli de Canicule al fâs madurî pomis, ue e panolis. Il cjaldon al fâs sintî i siei efiets su lis coltivazions e se la stagjon si presente une vore sute al covente proviodi, di buinore e sot sere, o ben lontan des oris plui cjaldis, a molâ aghe tes jechis, miôr se cun aghe za cjapade su in vascjis e cistiernis di pueste. Il contadin, che mai al polse dal dut, al pues tacâ cul displantâ jerbatis o barascjam che a impedissin la penetrazion dai rais dal soreli su lis pomis e duncje ‘ndi podarès ralentâ la madurazion; al controle il riprodusisi di foncs e mufis dapît des plantis, al va indevant a protezi lis vîts cun periodichis sborfadis di sulfât di ram. Tai zardins si fâs la cerpidure dai rosârs rampighins, si cimin lis rosis, si regolin i tapêts di jerbe e lis cisis cun arbuscj e rosis. Tai orts lis feminis a semenin cucins, cesarons, fasûi, vuainis, salate, latuiis, lidrics, rucule, valariane, ravanei e fenoi. ❚
Mario Martinis
______________________
RINGRAZIAMENT AL AUTÔR
Gjavât fûr di “Il grant lunari dal Friûl. Sants, fiestis e tradizions dal cicli dal an” (Pasian di Prât, 2012): o ringraziìn l’autôr pe disponibilitât e pe colaborazion ❚ ✒ Redazion