IL GRANT LUNARI DAL FRIÛL. Avrîl

RINGRAZIAMENT AL AUTÔR
Simpri gjavade fûr dal libri “Il grant lunari dal Friûl. Sants, fiestis e tradizions dal cicli dal an” (Pasian di Prât, 2012), e va indevant la colaborazion cun Mario Martinis che chest an nus propon un gnûf teme pe sô rubriche, cjalant il cicli de nature. ❚ ✒ Redazion
____
IL SORELI, LA ATMOSFERE, LA NATURE
Il soreli, passât l’ecuatôr celest, si jeve simpri di plui dilunc de sô parabule assendente, slungjant la durade dal dì e ridusint chê de gnot. Il clime si fâs simpri plui clip, cun zornadis di plene Vierte e cun ploiis sutilis, tant necessariis ae campagne che e sverdee. I cuadris de nature si fasin simpri plui dolçs e plens di vivôr pe vite gnove che e mene e che dapardut e pant il so sflandôr.
VORIS DAL CICLI AGRARI
Grandis voris tai vignâi ma ancje tai cjamps coltivâts e tes cjanivis. Tai orts si rarissin lis plantis masse fissis, si combatin i insets nocîfs e si sistemin lis jechis dai sparcs; a vegnin plantadis di gnûf fraulis, melons, anguriis, pomodoros, cudumars, cucins, melanzanis, pevarons, verzis, latuie, indivie, puars e selinos, e a vegnin semenâts basili, carotis, cicorie, blede, verze cincuantine e cocis. Tal zardin si cerpissin ancjemò cisis, simpriverts e arbuscj e si solcin i terens te maniere che e covente; a vegnin raridis e cerpidis ancje lis plantis intai vâs, areâts i lûcs des seminis, metûts a puest i sostegns ai cesarons e ai fasûi rampighins, in plui a vegnin metûts bulbis e rizomis cun floridure  vie pe Istât, ciclamins, ranuncui, zîs, papavars, crisantems, malvis regjinis, madalenis, violis e violârs. Tes cjanivis e va indevant la fase plui impuartante dal imbutiliament dal vin gnûf. ❚
Mario Martinis