Il mestri de “gjenerazion pierdude” che al veve la pene tant che une lame

Hemingway (Oak Park, 1899 – Ketchum, 1961) al ven considerat a buine reson un dai plui grancj autôrs dal ‘900. Cuant che i Stâts Unîts a jentrin in vuere, tal 1917, inmagât dal spirt di aventure, al partìs come volontari intal repart di assistence mediche ai combatents. Al à dome che disevot agns. Come lui altris grancj de so gjenerazion: John Dos Passos, William Faulkner e Francis Scott Fitzgerald. Al sarà in chê ocasion che al cognossarà le nestre Tiere, deventât un dai plui impuartants testemonis dal maçalizi propit vie pe disfate di Cjaurêt. Une tiere che i restarà dentri e che al savarà contâ in plui di cualchi pagjine di rare bielece. Bastian contrari, amant dal riviel e de baraonde, opositôr anarchic di ogni forme di podê e di prepotence, si forme culturalmentri in France, a Parîs, “in the fabulous Twenties”: intant che la Europe e sbrisse inte ete oscure dai fassisims, su la famose “rive gauche” si incuintrin artiscj, poetis, filosofs che a marcaran une gnove vision dal Mont e dal Uman. Desordenât inte so vite personâl, tal amôr, in politiche al fasarà part di che “gjenerazion pierdude” che e segnarà le diference jenfri chei inteletuâls omologâts e obedients e chei libars di esprimi la tragjedie e la bielece dal vivi, supant fin dentri la lidrîs ducj i siei colôrs. La so pene e sarà considerade une lame afilade pes colonis dai plui impuartants gjornâi internazionâi, là che si formarà une maniere di scrivi sute, scarnificade, dolorose e intal stes moment potente. Inviât speciâl, al sarà testemoni dai grancj cambiaments dal Mont, metint simpri dongje il viaç, la passion, un cjalâ stranît e diferent: ducj elements che a fasaran part de so vene narative, deventant la filigrane di ogni so capolavôr, tant che “Fiesta”, “A Farewell to Arms”, “The Snows of Kilimanjaro”, “For Whom the Bell Tolls”, “The Old Man and the Sea”. Cjaçadôr, grant bevidôr di rum, idealist, amant golôs e mai sodisfat, al dedicarà ancjemò une conte al Friûl, “Across the River and Into the Trees”, ispirât di une storie intense cun Adriana Ivanchich, cognossude a Tisane cuant che al jere ospit in cjase di Federico Kechler. Il grant fotograf Robert Capa nus à regalât lis plui bielis imagjinis di “Ernie”, o di “Papa”, come che lu clamavin i amîs: blanc e neri, lus e ombrene, voie di vivi e sintiment di muart, jenfri butilions svuedâts, libris, cuaders di scriture, ridadis e lagrimis. Une vite tant penze di emozions studade di un colp di fusîl che si è trat in bocje di bessôl, inte buinore dai 2 di Lui dal 1961. ❚