Sfuei Mensîl Furlan Indipendent
Archivi de Patrie

IL FRIÛL FÛR DAL FRIÛL. Dut ce che no si môf si romp

............
Renzo Bortolussi tal so zardin
Renzo Bortolussi tal so zardin

Renzo Bortolussi l’ecoartist dal Tiliment che al plâs fûr pal Mont

Al è un Friûl, lontan des stradis statâls, curiôs e origjinâl pes sôs testemoneancis di cemût che di secui nature e om a puedin vivi ben insieme e cun gust. Jù pe vie che di Borc dal Pian e va a Spilimberc, su la rive di çampe dal torent Cose, une cjase moderne cuntun zardin plen di sculturis fatis cu lis scovacis e je par ducj il ream di Renzo Bortolussi. Une barbe blancje suntune muse buine e caraterize un om che si è autodefinît “te Sierade de vite ma te Vierte par chel che al inten lis sodisfazions”. Renzo al è content plui dal solit parcè che al à vinçude la sô bataie plui grande: “Finalmentri al è rivât il “no” aes cassis di espansion, che a varessin ruvinât par simpri l’ecosisteme dal Tiliment, un flum unic che al à fat inamorâ plui di un forest”. Cu la sô associazion “A.c.q.u.a” e lis sôs protestis creativis, Bortolussi al à sensibilizât il mont intîr sul probleme “Cassis”, tant che tal mês di Otubar al è stât invidât a New York par partecipâ ae mostre “Art for the environment” che e celebrave l’artist Andrea Rusin, un furlan di Flumisel che al è daûr a vê un grant sucès cu lis sôs oparis leadis ae ecologjie tal “Grant Miluç”. Purtrop, l’uragan che al à colpide la cueste orientâl dai Stâts Unîts al à impedide la instalazion de foreste stilizade creade di Rusin e des realizazions de “The new Vision Art” di Bortolussi. Lis creazions artistichis no àn patît dam e a son a sotet intun magazen di Buffalo: dal comun di NY e je rivade la garanzie che prest la mostre si fasarà intun clime di gnove serenitât; intant, a son rivadis richiestis par vê la mostre in altris citâts. Bortolussi no si è pierdût di anim: blocât a Toronto, al è lat a cjatâ i amîs che al veve cognossût tai siei 17 agns di emigrazions tal paîs nord american e che no lu àn  lassât di bessôl tes sôs iniziativis verdis. In Canadà, la int origjinarie di Frisanc e dulintor si è complimentade cun lui par vê contribuît a fâ netâ il flum Colvare dai refudums che di agns lu sporcjavin. La fame di Bortolussi – par ducj “l’artist dal Tiliment” –, daspò il sucès di critichis ae Bienâl di Vignesie,  e à passât l’Ocean ma il leam cun cjase sô al è indissolubil. Prest, a Borc dal Pian, in doi etars di cjamp di sô proprietât,  al nassarà un parc artistic e  culturâl viert a ducj; intant, dai 14 di Novembar une sô instalazion e fâs biele mostre tal cjistiel di Spilimberc, che al da acet ae gnove “Quadreria d’arte Moderna e Contemporanea”, promovude dal pitôr contemporani Cesare Serafino. Cjase, lavôr, amiciziis, nature, rinassite: la filosofie di Bortolussi e caraterize ben il jessi furlan tal mont e il so sproc al divente pratic tes sôs sculturis, parcè che “dut ce che no si môf si romp”. ■
Daniele Martina

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +