IL FERÂL. I FURLANS E IL TEMPLI. (novesime pontade)

O vin scomençât chest an dal “Ferâl”, la rubriche dedicade a pre Antoni Beline, riproponint une sô riflession a pontadis. Il test complet al à il titul “I Furlans e il templi” e al presente un resonament sul rapuart dai Furlans cu la fede e la religjositât.
***
(novesime pontade)
[…]  I FURLANS E IL TEMPLI
Un vistît su misure o fûr di misure?
Chest implant al è rivât in dut il mont e naturalmentri ancje chi di nô, segnant in ben e in mâl la nestre religjositât. Al è in gracie o par colpe di chest Concili che il patriarcje di Aquilee Francesc Barbar (1593-1616) al à fat secuestrâ ducj i messâi e i libris liturgjics patriarchins, cun chel pôc che nus jere restât di nestri, e ju à fats brusâ denant des glesiis come che si faseve cui libris dai eretics. O sin fîs dai Celts, dai Romans e dai Langobarts e di Aquilee, cun dut ce che al compuarte come ereditarietât, ma no podìn no clamâsi ancje fîs di Rome, soredut fîs dal Concili di Trent, che al à dât il stamp plui evident e profont a la nestre religjon e religjositât, vadì al nestri mût di pandi, a nivel personâl e coletîf, chel fat misteriôs e insondabil che si clame fede. Nô no podìn cognossi la fede dai Furlans, ma o podìn cognossi, o tentâ di cognossi, la nestre religjon, la nestre struture religjose.
A chest pont une domande si podarès fâle: “La tradizion religjose tridentine e cuintririformistiche, dute incentrade sul templi e sul sacerdozi e duncje su la mediazion eclesiâl, jerie la plui adate par nô? Le vino cjapade come la strade plui naturâl par rivâ a Diu o come une strade obleade? La religjon catoliche romane jerie la piel che e riviestive il nestri cuarp o jerie in cualchi maniere une piel foreste? I Furlans jerino e sono propit catolics? Sono protestants?”.
Une domande di fonde, che no cjatarà une rispueste esaustive e che in ogni câs e à di tignî cont di dutis lis diferenziazions storichis, gjeografichis, economichis, antropologjichis, ambientâls e culturâls che o vin dit tal scomençâ cheste tabaiade. Parcè che i Cjargnei a son siguramentri plui protestants dai Furlans de Basse e soredut di chei a confin cul Venit. Mi riferìs ai Cjargnei e ai Furlans dal 1700/1800 e fin a la metât di chest secul, cuant che “a comandavin i predis”, no ai Cjargnei e ai Furlans di vuê, cuant che i predis a son in vie di estinzion e nol comande plui nissun. O forsit dome la television e la banalitât.
Pe stesse reson, la religjositât dai oms e je siguramentri plui luterane di chê des feminis, braide privilegjade e tantis voltis obleade e uniche pe opare di convinciment e di pression dai predis. Tai prins dal secul, cierts paîs de Cjagne, soredut in Val Pesarine, a jerin spartîts in maniere verticâl: lis feminis e i fruts a messe, a gjespui e a dutrine e i zovins e i oms inte Cjase dal popul. No jere la clime ideâl par cressi in armonie tra glesie e paîs e tra personis che a vevin di dividi la cuotidianitât e la prosaicitât de vite. No vin di dismenteâ che, par vocazion o par costrizion, e je stade la femine a tignî sù i classics trê cjantons. La femine e je stade la uniche che in famee e à trasmetût, se lu à fat, il sens religjôs, che duncje nol spiele dute la realtât furlane ma dome la part plui sensibile o romantiche o psicologjichementri influenzabile de societât. Dutis distinzions e precisazions che al è ben di tignîlis sot voli. ❚
[…]
(al va indevant sul prossim numar)
pre Antoni Beline