Sfuei Mensîl Furlan Indipendent
Archivi de Patrie

A mi ce mi impuartial?

............

Propit come che al à dit te sô omelie in timp di Messe pape Francesc sabide 13 di Setembar a Redipulie: “A jessi onescj, la prime pagjine dai gjornâi e varès di vê come titul: “A mi ce mi impuartial?”. Cain al disarès: “Soio jo il vuardean di gno fradi?”.
Dal viaç dal Pape al cimiteri austroungaric di Fogliano e al sacrari di Redipuglie o sin za informâts; al jere tant miôr però se i mass media a vessin metût di bande la plui part de cronache e a vessin publicât la uniche, vere, juste, grande novitât di chel incuintri cui muarts e cui vîfs: la predicje dal Pape. Chê predicje li, di bessole, e vâl plui di dutis lis imagjinis, informazions e coments.
Par chest o desideri trascrivi almancul alc di ce che il Pape al à dit:
«Dopo di vê cjalât la bielece di cheste tiere, li che oms e feminis a lavorin par tirâ indevant la lôr famee, li che i fruts a zuin e i viei a fasin siums… cjatantmi culì, in chest lûc, dongje di chest cimiteri o pues dome dî: La vuere e je une robe di mats.
(…) La ideologjie e cîr di justificâ la vuere, e cuant che no je la ideologjie e je la rispueste di Cain: “Soio jo il vuardean di gno fradi?”. La vuere no cjale in muse nissun: vielis e fruts, maris e paris… “A mi ce mi impuartial?”.
Sore l’ingrès di chest cimiteri al baline il sproc mincjonadôr de vuere: “A mi ce mi impuartial?”. Dutis chestis personis che a polsin culì, a vevin i lôr progjets, a vevin i lôr siums… ma lis lôr vitis a son stadis crevadis. Parcè? Parcè che la barbarie e à dit: “A mi ce mi impuartial?”.
E vuê, dopo il secont faliment di un’altre vuere mondiâl, si pues cjacarâ forsit di une tierce vuere combatude “a tocs” cun azions criminâls, maçalizis, sdrumaments.
(…) Chest compuartament al è propit l’incontrari di ce che al domande Gjesù tal Vanzeli. Lu vin sintût: Lui al è tal plui piçul dai fradis: Lui, il Re e il Judiç dal mont, al è chel che al à fan, sêt, che al è forest, malât, in preson. Chel che si cjape cure dal fradi al è te amicizie dal Signôr; chel invezit che no si compuarte cussì, al passe dret e al dîs: “A mi ce mi impuartial?”, chel al reste taiât fûr.
(…) Ancje vuê lis vitimis a son tantis… Cemût isal pussibil dut chest? Al è pussibil parcè che daûr des cuintis a son i interès, i plans politics pal domini dai stâts, arsure di bêçs e di podê, e je la industrie des armis che, cence di chê, al somee no si puedi lâ indevant!
E chescj inzegnîrs dal terôr, chescj organizadôrs dai conflits, come ancje i imprenditôrs des armis, a àn scrit tal cûr: “A mi ce mi impuartial?”.
La persone di sintiment e amet i sbalgjos, i dûl il cûr, si pintìs, e domande perdon, e vai.
I afariscj de vuere, cun chel “A mi ce mi impuartial?” che a masanin dentri, forsit a vuadagnin tant, ma il lôr cûr al à pierdût il don dal vaî. Cain nol à vaiût. Nol à podût vaî. Vuê, in chest cimiteri, l’ombre di Cain nus cuvierç. Si le viôt culì. Le tocjìn inte storie che e rive dal 1914 fin a lis nestris zornadis. E si le palpe ancje ore presint.
Cun cûr di fi, di fradi, di pari, o domandi a ducj vualtris e par ducj noaltris la conversion dal cûr; passâ dal: “A mi ce mi impuartial?” a lis lagrimis. Lagrimis par ducj i muarts di chel – maçalizi fat dibant – par dutis lis vitimis de matetât des vueris di ogni timp. Nus reste dome il vaî.
Fradis, la umanitât e à dibisugne di vaî; e cheste e je la ore des lagrimis». ❚
T. Z.

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +